Afyon, Anqara û Konya de komanê nîjadperestan hêrişê kurdan kerbi û xeylêk kesî birîndar bibî. Hêrişê Konya de Hakîm Dalo 43 serre ame qetilkerdene.

Hemserekê HDPyî yê Amedî hêrişê nîjdperestî ANFyî rê ercnayî.

Ceylanî ard ziwan ke nê hêrişî nêçareserkerdişê meseleya kurdan ra semed qewimîyenê û polîtîkayê nikayênî yê dewlete sebebê nê hêrişan ê. Ceylanî vat: ''Serranê 90an de zî kurdî wina ameyî hedefkerdene û hêrişê winasênî zaf qewimîyayî. Kamca de kurdî qels ê nê hêrişî estê. Sebebê nê hêrişan bi xo dewlet a. Êyê ke bingeyê nê hêrişan amade kenê desgeh û sazgehê dewlete yê. Eke dewlete hêrişê vera kurdan şermezar bikerdêne serebûtê winasênî nêqewimîyayêne. Her roje kurdî yenê sûcdar û krîmînalîzekerdene. Biewnê serebûtê Denîze Poyraz.''

Ceylanî îfade kerd ke wexto ke şaristananê Tirkîya de kurdêk bêro qetilkerdene dewlete kiştoxê ci ya sey aqilî ra feqîr yan zî sey gêjî mojnena. Ceylanî vat: ''60 kesan hêrişê keyeyêkê kurdî kenê la dewlete vana no serebût edlî yo. Dima zî versûcan pawena. Wexto ke baroyî wayîrê keyeyî zî vejîyenê dewlete baroyan sey sûcdarî nîşan kena. Ganî nê hêrişî bêrê eşkerakerdene. Eke serê nê hêrişan bêro girewtene alozîyî û hêrişî benê pîlêr. Kurdî ganî wayîrê yewbînan vejîyê û xo rêxistin bikerê. Kurdî ganî qetî yewbînan têna meverdê. Ma qetî nîjadperestî û şovenîzmî nekenê.

Herinda ke meseleya kurdî bêra çareserkerdene hêrişê winasênî yenê kerdene. Cergêkî (Sedat Peker) îtîraf nêkerdbi ke vera kurdan hêrişî do bêrê kerdene? Xora dima Denîze Poyraz ameye qetilkerdene. Eke ma pîya vera hêrişan tewirêkê xurtî nêmojnê siba serebûtê pîlî do biqewimîyê. Kesê ke ewro nê hêrişan ra hêz gênê siba do tira zerar bivînê.''