23ê teşrîna peyêne de bi tewrbîyayîş û paştdayîşê 45 temsîlkaranê komel û partîyanê sîyasîyan Amedî de komxebata awankerdişê Torra Ziwan û Kulturî kerde. Komxebate de bira hîrakerdişê Torra Ziwanî Kulturî û komxebatêka hîra girewte. Seba îdareyê xebatan û amadekarîya kombîyayîşan sekreterya ya ke 7 kesan ra yena meydan ameye weçînayene. 45 kesî zî do sey heyetê mişewreyî yê Torra Ziwanî û Kulturî  xebatan dewam bikê. Derheqê ''Torra Ziwanî û Kulturî'' de wekîlê HDPyî yê Amedî Îmam Taşçierî ANFyî reyde qisey kerd.

Taşçierî vat: "Destpêkê komare ra heta ewro dewlete polîtîkayê xo yê asîmîlasyonî ra fek vera nêda. Asîmîlasyon û tedaya kurdkî ser o dewam kenê. Wexto ke ez doman bi mi tirkî nêzanayêne. La heyf o ke rîyê tedaya dewlete ra domanê kurdan hînî kurdkî nêzanenê.

Tirkîya û Kurdîstanî de zaf roşnvîrî û dezgehê kurdan ziwan û kulturî ser o xebatan kenê. Ma waşt ke bi kombîyayîşêk bêrê têhet. Dewlete çend serran ra nat xîret kena ke rastîya welat û şarê kurdî çin bika. Ma kombîyayîşê xo yê verênî yê 'Torra Ziwanî û Kulturî' de plansazîye senî biba, babeta ziwanî senî yena daşinasnayene se ro muneqeşayî kerdî. Ziwan estuna bingeyêne ya neteweyan a. Pawitişê ziwanî pawitişê neteweyî yo. Ganî ziwan ser o ma pîya xebatanê xo zêde bikê û astengîyê verê ziwanî wedarê.

Ganî her keye domananê xo reyde bi kurdkî qisey biko. Ganî pêro cuya ma kurdkî biba. Dewlete çend qedexe zî biko ma eşkenê nê sînoran derbaz bikê û bi ziwanê xo qisey bikê. Ma sey HDPyî Kurdîstanî de seba averşîyayîşê ziwanî û seba ke kurdkî biba ziwanê fermî  do xebatan bidê destpêkerdene.

Ganî kurdî û xebatkarê nê ziwanî pêro astengan û qedexeyanê ziwan ser o bi qiseykerdişê kurdkî çin bikê. Armancê Torra Ziwanî û Kulturî zî no yo. Na çarçewa de ma wazenê ke bi nê kesanê ke ziwanî ser o xebitîyenê kombîyayîşanê hîrayan bikê. Fikr û nêzdîbîyayîşê cîyayî estî û bi nê kombîyayîşan ma wazenê fikr û nêzdîbîyayîşanê xo bikê yew."