Hêrişê dewleta tirke yê vera Heftanînî dewam kenê.

Fermandaranê xoverdayîşê Heftanînî ra Hêjare Zozan derheqê Cengê Heftanînî de ANFyî rê qisey kerd.

Qiseykerdişê Hêjare Zozan ra beşêk wina yo:

''5 mengan ra nata Heftanîn de xoverdayîşêko pîl esto. Dewleta tirke xîret kena ke Heftanîn de ca bida xo. La artêşa tirke dima ke bi giranî bin kewte leşkerê xo apey girewtî, cerg û qoricîyî dayî vernî. Çalakîyanê gerîlayanê HPG û YJA-Starî xîretê înan ê îşxalî asteng kerdî. Coka dewleta tirke metodê neweyî afernayî. Mîsal ge ge seke operasyon esto zanayîşan dana. La reyna zî ê nêeşkê netîce bigêrê.

Tewirê şehîdan hêz da ma. Mîsal Şeşdara de rayberîya embaze Esmere de ma derbê pîlî dayî dişmenî ro. Reyna waranê Heftanîn, Xantûr, Qesrokê, Kendal û Bektorya de rayberîya şehîdan de derbê pîlî dîyayî dişmenî ro. Ma do sey embazanê xo yê şehîdan cewabê îşxalkeran bidê. Seba ke ma qesasê înan bigêrê ganî çalakîyanê xo bizêdînê. Dewleta tirke tim vana 'Ma do înan biqedînê.' La her kes zaneno ke no raşt nîyo. Ma pêro şehîd bibê zî PKK do biciwîyo. Heta ke Rayber Apo û şarê ma yo xoverdayox weş bibê PKK nêqedîyeno. Çunke PKK bingeyê xoverdayîşêkê tarîxîyî ser o ronîya.

Nika vera Rayberîya ma tecrîdêko pîl yeno caardene. Ganî şar û gerîlayî têkoşînê vera tecrîdî pîlêr bikerê. Ganî ruho xoverdayox ê Heftanînî her ca de bêro geşkerdene. O çax dişmen zî do çin bibo û şoro verê Rayberîye. Coka ganî her kes tewrê Hemleya 'Wext Wextê Azadîye yo' ya KCKyî bibo.''