Vengdayîşê Rayber Apoyî ra dima seba haştîye xîretî yenê kerdene. Dewlete ra pawitişî zî zêdîyayî. Bi hezaran merdimanê ke bedelî dayê, hema zî ê aqîbetê cenazayanê xo persenê. Keyeyî vanê ke ganî haştîye bi qiseyî nêmana. Keyeyê ke qedexeyê des serran ra dima seba roşanî şîyî zîyaretê goristanî raştê goranê rijnayeyan ameyî.

Hêrişê vera goranê şehîdan bi sîstematîkî yenê kerdene. Kerrayê gerîlayanê şehîdan yenê şiknayene û bi rengê reşî yenê boyaxkerdene.

Hemserekê MEBYA-DERî yê Amedî Mehmet Emîn Kiliçî derheqê babete de ajansê ma rê qisey kerd.

Kiliçî îfade kerd ke hêrişê vera goran sûcê vera merdimatîye yê û ganî haştîye bi hûrmetê seba merdeyan dest pêbikera. Kiliçî vat: ‘’Dewlete tim hêrişê goristanan kena. Kerrayê goran yenê şiknayene, cenazayî goran ra yenê vetene. Ma çend reyî na rewşa bêexlaqe viste rojdemî. La nê kerdişî dewam kenê. Xeylê herêmanê qedexekerdeyan de merdimî roşanan de şinê serê goran la bi goranê rijnayeyan têrî manenê. Tayê keyeyî qedexeyan ra nêeşkenê goranê xo bivînê zî. No yew gama haştîye nîyo. 

Seba ke peynîya rijnayîşî bêra haştîye şert a. Haştîye reyde ma wazenê nê rijnayîş û talanî biqedê. Wa hinî ne goristanî bêrê xerakerdene ne zî keyeyî goranê rijnayeyan de dua bikerê. Keyeyî hinî aramîye wazenê. Ma do seba haştîye tim têkoşîn bikerê.’’