Temsîlkarê Heyetê Herêmî û Ekolojî û Endamê Meclîsê Pêroyî yê PYDyî Silêman Erebî derheqê Qirkerdişê 12ê Adara 2004î de ANFyî rê qisey kerd.

Erebî îfade kerd ke 12ê Adare Rojawanê Kurdîstan de rojêka tarîxî ya û vat: ''Her çiqas no serewedaritiş stadyum de qewimîya pêro şarî ra vila bi. Rejîmê Baasî waşt ke nê serebûtî bikero hacetê kayan. Wextê nê serebûtî de rejîmî domanî kiştî û coka şar de tehamul nêmend. Bi des hezaran kurdî vejîyayî meydananê Rojawanî û sîyasetê dewlete qebul nêkerd. Kurdî seba ke Wisarê Şaran bidê destpêkerdene Dêrikî ra heta Efrînî vejîyayî teber.  Rejîmî xîret kerd ke pê tepiştiş û kiştişan çimê kurdan bitersno û mabênê ereb û kurdan de fîtne bikero. Baas ser nêkewt.  Kurdî pê hesîyayî ke ganî yewîya xo awan bikerê û xo îdare bikerê.''

Erebî ard ziwan ke 12ê Adare seba Şorişê Rojawanî sey hîkayeyêka destpêke bi û vat: ''12ê Adare bingeyê Şorişê 19ê Temmuze awan kerd. Ma hesabê 12ê Adare bi hawayêkê fermî rejîmî ra nêpersayî.  A roje bi desan cinî û lajê ciwanî kişîyayî. La 19ê Temmuze de pê ronayîşê Îdareyê Xoserî, YPJ û YPGyî, QSDyî cewab dîya rejîmî.  Rejîmê Şamî hema zî hîşmendîya xo ya şovenîste rê dewam keno û ma qebul nêkeno.''

Erebî da zanayene ke kurdan Serewedaritişê 12ê Adare de yewîya xo awan kerde û vat: ''Rejîm bi seyan ciwanî zanîngehan de tepiştî, sivîlî tersnayî. Nameyê ê stadyumê Dêra Zorê nika Stadyumê Şehîdanê 12ê Adare yo. Şarê Dêra Zorê mîyanê şorişî de ca girewt. A roje hetê bînî ra ma de birîn o çunke ma bi desan ciwanê xo kerdî vînî. Cuya ma vurîyaye. Nika Rojawan de Îdareyo Xoser esto û her roje zêdêr aver şinê.''