Ê çar hetanê Kurdîstan û dinya ra seba têkoşînê azadîye şîyî Rojawanî. Tayê înan birîndar bîyî, tayêne zî şehîd. La înan peyê xo de tim rêçêk verda. Şarê Rojawanî zî wayîrê rêçê înan vejîya.

Her ke nê milîtanê azadîye ameyî şarê Rojawanî zî ê nêzdî ra şinasnayî. Şarê Rojawanî her ke şehîdî dayî hîna zaf verê xo da têgêrayîşê azadîye. Şarê Rojawanî nê şehîdî sey ewladê xo dîyî. Heta şehadetnameyê tay şehîdan zî dîyayî nê keyeyanê Rojawanî.

Keyeyê welatperwerî Guloyî ra Şemsîxane şehîd Harun Raman Torî (Addurrahman Tapkan) sey ewladê xo dî ke o 3yê temmuza 2016î de hemleya azadkerdişê Minbicî de şehîd bîyo. Şemsîxane Gulo ard ziwan ke ê tim perwerê şehîdan ê û vat: ''Harun pa lajê mi şehîd bi. Mi Meclîsê Keyeyanê Şehîdan ra waşt ke wa şehîdnameyê ci bido mi. Şerwanê azadîye, bi serran o seba ma ganê xo feda kenê. Ma se bikerê zî nêeşkenê heqê înan bidê. Xêrê înan ra Şorişê Rojawanî hende bi pîl. Bi taybetî ciwanê Vakurê Kurdîstanî seba ma ameyî û tîya de şehîd bîyî.''

Babîyê Têkoşîne Xelîla ke 2015 de Colemêrg de şehîd bîya, Mihemed Xelîlî zî şehadetnameyê Zîlane girewto. Mihemed Xelîlî vat: ''Kênaya mi mi ra dûrî de şehîd bîye. Zîlane zî hetê ma de şehîd bîye. Mi şehadetnameyê Zîlane girewt. A zî kênaya min a. Ez tim şina gorê aye ser. Eke ma welatêkê azad û xoserî wazenê ganî bi fedayîtî erdê xo bipawê.''