Hemserekanê Îdareyê Xoserî derheqê hêrişê vera Zîndanê Sînaa de eşkerayîye daye. Eşkerayîye de şehîdî ameyî yadkerdene û xoverdayîşê QSD û Hêzanê Asayîşê Zereyî şarî ame selamkerdene.

Eşkerayîya QSDyî wina ya:  ''Şerê Kobanê ra heta Baxozî û Zîndanê Sînaa de QSD, YPJ û Hezanê Asayîşê Zereyî  semedê pawitişê merdimîye 12 hezar şehîdî dayî û 25 hezaran ra zafêr kesî birîndar bîyî.  Pîya bi naye problemê terorî, hucreyê nimiteyî yê DAÎŞî û waranê ke xeylêk wextî binê îşxalê DAÎŞî de mendî de hema îdeolojîya ci dewam kena. Destê Îdareyê Xoserî de nizdê 12 hezar endamê DAÎŞî estê. Nînan ra 2 hezarê înan iraqijî 2 hezarê bînî zî 50 welatanê cîya cîyayan ê bînan ra yê, 5 hezar zî sûrîyeyîj ê. Reyna keyeyanê înan ra zî bi des hezaran kesî kampanê Hol û Rojî de manenê. Îdareyê Xoserî û QSDyî ê pawitî.  Nê barê Îdareyê Xoserî giran kerd.  Rixmê naye QSDyî vera çeteyanê DAÎŞî operasyonî kerdî û xeylêk çeteyê ci tepiştî.

Wa her welat hemwelatîyanê xo bîgêro

Ma xeylêk rey bi eşkerayîyan bale ante nê tehlukeyî ser û vat na meseleya heme komelî ya. Ganî Îdero Xoser û hêzê mîyannetweyî koordînekerde na mesele çareser bikerê. Ya wa mehkemeya xoser a mîyanneteweyî bêro ronayene ya zî mehkemeyêka hetê komelê mîyanneteweyî ra zî yena naskerdene wa warê Îdareyê Xoserî de bêro ronayene nê bêrê muhakemekerdene. Wa dewletê ke hemwelatîyê înan mîyanê çeteyan de berpirsîyarîya xo bîyarê ca. Bitaybetî cinî û domanî wa hemwelatîyanê xo peyser bêrê, muhakeme bikerê, reyna mîyanê komelî bikerê û perwerde bikerê. Ganî semedê pawitişê nê domanan paştî bîdîyo Îdareyê Xoserî.

Kampa Holî de tim qirkerdiş esto

Seba ke komelê mîyanneteweyî berpirsîyarîya xo nêano ca nê problemî qewimîyenê. Kampa Holî de her roje yew qirkerdiş beno. Merdimî yenê serebirnayene û şewat vejîyeno. 20 çeleyî de Zîndanê Sînaa yê Hesekê hedef ame girewtene. 200 çeteyê DAÎŞî cayanê binê îşxalê dewleta tirke ra dîyayî ardene ke DAÎŞ newe ra bêro ganîkerdene.

Rolê dewleta tirke

Terorîstan dormeyê zîndanî de têmîyankewtiş vet, hetê bînî ra dewleta tirke û çeteyanê ci Eyn Îsa de hêrişê sîvîlan kerd. Hukmatê Şamî ,Erdogan û hemaranê ci pîya kerd ke nê hêrişî ra feyde bikerê. Înan  dest pê sûcdarkerdişê Hêzanê Koalîsyon û QSDyî kerd. Waştişê înan o bi ke Îdareyê Xoserî çîn bikerê û paştî bidê çeteyan. Eynî ame waştene ke herême de şaran biverdê yewbînan. No sîyaset têne xîzmetê terorî keno.  La fedakarîya şarê ma û hêzanê ma planê înan pûç vet. Serrgêra Kobanê de teror û paşgêrê ci reyna bin kewtî.

Wa paştdayîş bêro dayene

Semedê vergirewtişê terorîzmî ganî komel û koalîsyonê mîyanneteweyî pîya têbigêrê.  Wa vera çeteyanê DAÎŞî zafêr paştî bidiyo QSD û Hezanê Asayîşê Zereyî. Wa mehkemeya mîyanneteweyîye bêro ronayene û sûcdarî bêrê muhakemekerdene. Wa heme welatî hemwelatanê xo peyser bigêrê. Ya wa paştî bidîyo Îdareyê  Xoserî ya rewşa zîndanan û kampan bêro holkerdene.  Wa paştdayîşo ekonomîk bidîyo Rojawanî. Wa herême 'Qanûnê Sezar'î ra bêro vetene. Wa Berê Sînorî yê Til Koçerî newe ra bêro dest girewtene.  Hetkarî yê ke hetê komelê mîyanneteweyî ra Şamî ser ra benê kêm manenê. Neteweyê Yewbîyayeyan vano înan semedê Hesekê 36 tir hetkarî şawito. Hetkarî ke yeno şino merkezê kontrolî yê Qamişloyî. Tîya binê kontrolê Şamî de yo coka hetkarî nîna.

Wa şiro dewleta tirke ser

Wa semedê naskerdişê sîyasîyî yê Îdareyê Xoserî paştdayîş bêro dayene. Semedê asayîşê herême xebatî bêrê kerdene. Dewleta tirke ya faşîste cayê ke îşxal kerdî de ca dana teroristan. Ganî şiro dewleta tirke ser ke wa nê cayanê îşxalkerdeyan bêro xo peyser bianco. Dewleta tirke seba ke asayîşê herême çîn bikero terorîstan şuxulnena û sîvîlan hedef gena. Hêrişê Hesekê tehlukeyo pîl bi. Netîceya nê de 121 xebatkarê leşkerî, asayîş û zîndanî  û sîvîlî şehîd bîyî. Seba ke çîyo wînayên reyna mebo ganî koalîsyon û komelê mîyanneteweyî pîya bi Îdareyê  Xoserî hezanê leşkerî û asayîşî têbigêro. Ma şarê xo yê Hesekê rê spas kenê ke înan paştî dayê hêzanê asayîşî. Ma reyna şehîdanê xo yad kenê. Wa no zî bêro zanayene ke şarê ke taxanê Xiwêran û Zixûrî ra bar kerd do peyser agêro keyeyanê xo.''