QSD: Îşxalkerî sivîlan kenê hedef

QSDyî eşkera kerd ke hêrişê dewleta tirke û cerganê aye dewam kenê. QSDyî pare kerd ke nê hêrişan de sivîlî yenê hedef kerdene û şehîd û birîndarê sivîlî estê.

QSDyî derheqê hêrişanê dewleta tirke û cerganê aye yê vera Rojawanî yê 9-10-11-12ê çeleyî de eşkerayîyêka nuştekîye kerde.

Eşkerayîya QSDyî wina ya:

"Dewleta tirke ya îşxalkere û cergê aye seba ke îşxalê xo hîra bikerê hêrişanê xo dewam kenê.

Eyn Îsa

9ê çeleyî de noqtaya kontrolî ya Eyn Îsayî ser o bombayî ameyî varnayene. Netîceyê nê bombardûmanî de hemwelatîyêk û endamêkê asayîşî birîndar bîyî. Heman roje artêşa îşxalkere bi obusan û tankan hêrişê dewa Hoşanî ya nêzdîyê rayîrê M4î yê mîyanneteweyî kerd. Netîceyê nê hêrişî de zerar resa mal û mulkê sivîlan ser.

Girê Sipî

Artêşa tirke ya îşxalkere û cerganê ci 10 û 11ê çeleyî de bi hawanan û obusan dewanê Erîda, Şorbê û Qiz Alî ser o bombayî varnayî. Netîceyê nê bombardûmanî de zerar resa mal û mulkanê sivîlan.

Tirbêsipîyê

12ê çeleyî de saete 13:00 de artêşa dewleta tirke û cerganê ci waro ke nêzdîyê dewa Dugirî ya û tede hêzê asayîşî yê sivîlî estbî kerd hedefê xo. Netîceyê nê hêrişî de 2 hêzê asayîşî û sivîlêk şehîd bîyî. Netîceyê bombardûmî de zaf sivîlî birîndar bîyî. Artêşa tirke ya îşxalkere roja verêne ya adirbirnayîşî ra heta nika binpaykerdişê heqan dewam kena."