Forumê Efrîn de Vurayîşo Demografîk û Esteritişo Etnîkî yo Mîyanneteweyî de şahidanê ke bibî şahidê qirkerdişanê û talankarîya dewleta Tirkî ya îşxalkare û çeteyanê ci qisey kerd.

Şahidan vat verê çimê hemeyê dinya de dewleta Tirkî bi sîlehanê teknolojîya avere kewte Efrîn û hemverê qirkerdiş û talankarîya ci de hewna zî tewiro ke lazim o nêameyo girewtene.

Şahidan ra yewî vat gama ke Cindires ra vejîyayê teyareyanê şerî înan ser de bombayî varnayê, netîce de birayê ci merdo, keyeyê ê ra tayê zî birîndar bîyê.

Şahidan bale ante wexto ke Efrîn ame îşxalkerdene xeylî domanî zî ameyî kiştene. Dimayê îşxalî ra Kurdkî amî qedexekerdene, Erebkî û Tirkî şarî ser o amî ferzkerdene, bi nê hawayî yeno waştene ke demografîya ûcayî bêro vurnayene. Şahidan ard ziwan seba ke çîyo ke ame serreyê şarê Şengalî nêro serreyê înan înan Efrîn ca verdayo, îşxalkaran keye û malê înan xesp kerdê.

Keynayêka Efrînije ya ke ê wextî wendekera sinifa pancan bîya zî vat keyeyê înan ameyo bombardûmankerdene, na yewe ra mecbûr mendê ke bar bikerê. Cinîyêka bi nameyê Eyîşe ya êzidîye zî vat çeteyanê pabesteyê dewleta Tirkî ya îşxalkare dewê înan talan kerdê, cayê înan ê dînîyan rijnayê, darî birnayê û seba girewtişê fîdyeyan sivîlî remnayê.