Şehîd Anter Dêrsimo ke 11ê teşrîna peyêne de krîzê qelbî ra şibi heqîya xo serê gorê xo de ame yadkerdene.

Bi wesîleya roja 40. ya şehadetê ci Meclîsê Keyeyanê Şehîdan ê Qamişloyî serê gorê ci de Goristanê Şehîd Delîl Saroxanî de merasîmê yadkerdişî serûber kerd. Keyeyê şehîdan, roniştoxê herême û endamê dezgehanê Îdareyê Xoserî zî tewtê merasîmî bîyî.

Merasîm de nameyê Meclîsê Keyeyanê Şehîdan, Hemsereka Meclîsê Keyeyanê Şehîdan a Qamişloyî Hêvîye Sayîd qisey kerd û ard ziwan ke Şehîd Anter Dêrsim têkoşerêko fedayî bi û seba Kurdîstanî têkoşîn kerd.''

Dima Hemserekê Meclîsê PYDyî yê Qamişloyî Mesûd Dawudî qisey kerd û vat: ''Şehîd Anter rayberê têkoşînê şarê Kurdîstanî bi, şehadetê ci seba ma vînîbîyayîşêko pîl o. Çunke ma hertim hewcedarê kesayetanê têkoşer, şorişgêr û xoverdayoxanê sey Anterî yê.''

Hemsereka Meclîsê Kantonê Qamişloyî Perwîne Yusif zî îfade kerd ke şehîd Anter seba vilakerdişê fikrê projeyê neteweya demokratîke têkoşîn kerd.

Merasîm pê sloganê 'Şehîdî nêmirenî' qedîya.