Şerwano ereb ê YPGyî Rojhat Agir Hama ra yo. 2011î ra verî dewanê Hama de eşîra Agirî Agêdatî seba ke waşt tradîsyonê xo ser o biciwîya raştê tedaya rejîmê Şamî ameye. Şerê zereyî yê Sûrîye de dewê Hama kewtî destê OSO, Nûsra, DAÎŞî. Agir û keyeyê ci gefanê DAÎŞî ra remayî, şîyî Hesekê û YPG şinasna. Agir 5 serrî yo şerwanê YPGyî yo.

Rojhat wina qala tewrbîyayîşê xo yê YPGyî kerde: ''Rejîmê Sûrîye waştêne her kes goreyê sîstemê ci biciwîyo, eşîra ma kulturê xo ser o vindertêne. Ma dewe de nanê xo bi xo viraştêne la rejîmî no qebul nêkerd, pê zorî ma rê nan şawitêne ke ma bihêrînê. Wextê şerê Sûrîye de dewê ma kewtî destê cerganê OSO, DAÎŞ û Nûsrayî. 

Hama de xeylêk şarî ciwîyenê. Şaranê herême nê cergan de pênêkerd, tedaya înan qebul nêkerde. Ma zulmê DAÎŞî ra şîyî. DAÎŞî Hama de zaf zulm kerd, merdimî kiştî, her kesî tira tersayêne.

MA 2014 de Hama ra şîyî Hesekê. Taxa ma ya Hesekê zî kewtê destê DAÎŞî. Dima ma YPG şinasna. O çax rejîmî çîyêk nêkerd la YPGyî taxe pawite heta tay leşkerê rejîmî zî DAÎŞî ra pawitî.

Babîyê mi tewrê asayîşî bi û şerê Hesekê de ca girewt. Ma hînî kurdî, YPG, Asayîş şinasnayî. Mi babîyê xo ra persa 'Ê leşkerê kurd ê, ti senî tewrê ci benî?' Babîyê mi zî vat her kes pîya şer keno û hurmetê yewbînan keno. Şerê YPGyî yê vera DAÎŞî zaf tesîrê mi kerd.

Mi Hemleya Azadkerdişê Minbicî de YPG şinasna û şerê vera DAÎŞî yê reqa de ca girewt. Mi dî ke ereb, kurd, sûryan û şarê bînî pîya şer kenê, ciwîyenê. Ez zaf şaş bîya.YPGyî dima ke DAÎŞ qedîna bi hêvîya şaran. Ma dî ke YPG û Îdareyo Xoser sey dewlete nîyê. Dewleta Sûrîye nasnameyêkê bînî qebul nêkena. La waranê Îdareyê Xoserî de her kes eşkeno pê ziwanê xo perwerde bivîno. 

Êyê ke tewrê YPGyî bîyî ercîyaye yê. Cuya demokratîka ke YPG û Îdareyê Xoserî vete werte dewletanê serweran tersnena. La bi taybetî azadbîyayîşê Reqa, Tebqa û Dêrazorê ra dima xeylêk erebî tewrê YPGyî bîyî.

Ez bi xo ereb a la dima ke ez tewra YPGyî bîya ez 2 mengan de kurdkî musaya. Çewî mi rê ferz nêkerd, mi waşt ez musaya. 

Ma sey hêzanê azadîwaştox û haştîwaştoxan ganî vera hêrişê qirkerî yê dewletanê serweran yewîya xo geşêr bikerê. Eke ma yewîya xo xurtêr nêkerê ma nêeşkenê welatê xo bipawê.''