Endamê Konseya Hemserekîye ya PYDyî Aldar Xelîlî derheqê eşkerayîyanê Hetkarê Wezîrê Karanê Teberî yê Sûrîye Beşar Caferî de, derheqê têkilîya rejîmê Şamî û Tirkîya de ANFyî rê qisey kerd.

Aldar Xelîlî ard ziwan ke dewleta tirke nêverdana meseleya Sûrîye bêra çareserkerdene û vat: ''Dewleta tirke pê kerdişanê xo ruh da rejîmê Şamî, rejîm payan ser o vindarna. Tirkîya ra nêbîyêne Şam û şaranê Sûrîye pîya mesele çareser kerdêne. Ma sey muxalîfan Erdoganî qebul nêkenê coka tim maruzê hêrişan benê.

Îşxalê Efrîn, Serêkanîyê û Girê Sipî ra dima xoverdayîşî qewimîyayî. Tirkîya vera ney zî herême de fîtneyan kena. MÎT rejîmê Şamî rê vano wa selahîyetdaranê Rojawanî reyde pêvînayîş mekero. Erdoganî 2011-2012 de vatêne 'Ganî rejîmê Esadî bêro rijnayene.'  Nika wina nêvano. Ma goreyê projeyê demokratîkî vanê wa asûr, sûryan, ereb û kurdî pîya îdare de ca bigêrê. La Erdogan ney qebul nêkeno û vera ci fîtneyan keno. Dewleta tirke herême de şerê psîkolojîkî kena, aramîya herême xeripnena. Rejîmê Şamî û dewleta tirke têna dişmenîya vera Rojawanîş de pêkenê

MÎT keno ke herême de alozîyan vejo. Minbic, Dêra Zorê, Şedad de alozîyê winasênî qewimîyayî. Pê hîsgerî û mesuldarîya Îdareyê Xoserî û hêzanê asayîşî kayê Erdogan û rejîmî ser nêkewtî û verê parçebîyayîşê komelî ame girewtene.''

Xelîlî bale ante eşkerayîyanê Hetkarê Wezîrê Karanê Teberî yê Sûrîye Beşar Caferîyî ser û vat: ''Aya ke El Nûsra awan kerde, DAÎŞ weye kerd, paştî daye cergan dewelta tirk a. Caferî nêvajo zî her kes ney zaneno. 2014 de wextê xoverdayîşê Kobanê de her kesî dî dewleta tirke senî sînoranê xo ra cergî derbazê Rojawanî kerdî. Na rewşêka nimite nîya. Kerdişê Tirkîya Azerbaycan, Lîbya, Dengizê Sipî, Sûrîye û Iraq de verê çiman de yê. Yanî çîyêko newe nêqewimîyeno.

Mabênê îstîxbaratanê rejîmî Muhaberatî û MÎTî de têkilîyî estê. Nika mabênê înan de tay alozîyî zî estê. Babeta Îdlîbî de rejîmê Erdogan û Şamî pê kewtî. Semedo ke rejîm meseleya Îdlîbî de Tirkîya rê teda bikera eşkerayîyanê winasênan dano. Reyna rejîmê Sûrîye wazeno xo sey 'pawitoxê erdê Ereban' bimojno coka wina têgêreno.''