Enternasyonalîsto alman Goran Kobanê seba têkoşînê vera DAÎŞî 6 serrî verî şîyo Rojawan û bîyo wayîrê xeylêk tecrubeyan. Şerwanê almanî Goran Kobanê venga her kesî da ke Şorişê Rojawanî nêzdî ra bişinaso û vat: ''Paştdayîşo ke rolê cinîyan rê yeno dayene cayêkê bînî yê Rojhelatê Mîyanênî de çin o. Coka bêrê û biewnê. Tîya cayêko bêhempa yo.''

Goran Kobanêyo ke pê ruhê seferberîye yê Xoverdayîşê Kobanê ame Rojawanî vat: ''Hamnanê 2015î de, seba şerê Kobanê ez ameya tîya. Pêro çapemenîye qala Kobanê kerdêne, hêrişê DAÎŞî zêdîyabîyî. Her kesî vatêne eke Kobanê bikewa destê DAÎŞî Ewropa û cayê bînî zî do bikewê destê înan. Nê motîvasyonî ser o ez ameya. Xoverdayîşê Kobanê zaf weş bi. Kobanê de şerêko çêr, fedakarî estbî. Tirk, kurd, ereb û enternasyonalîstan waştêne  pîya xo ver bidê. Ney zaf tesîrê mi kerd. Almanya wextê şerî de tewirê xo nêmojna, hetkarîyêka madî nêdaye. Almanya rixmo ke zanayêne Tirkîya paştî dana DÎŞî têkilîya xo bi aye rê dewam kerd.

Kobanê mojna ke prosesê binkewtişî yê DAÎŞî dest pêkerd. Kurdan û embazan xoverdayîşêko pîl kerd û DAÎŞî xo apey ant.  No destpêkê qedîyayîşê DAÎŞî bi.DAÎŞ çinbi la herême de fikrê ci pê OSO, El Nûsrayî dewam kenê. Tirkîya destek dana înan, pawena û armnac kena ke kurdan qetil bikerai modelê Îdareyê Xoserî çin bikera.

Seba ke Tirkîya Efrîn, Serêkanîyê û cayanê bînan ê îşxalkerdeyan ra xo apey bigêrê ganî Almanya tedaya ci bikera. Çekê ke dîyenê Tirkîya pê bacanê şarê ma yenê fînanskerdene. Nê mergan ra her kes mesuldar o. Nê çekî pêro Almanya ra yenê.''

Goran Kobanêyî venga ciwanan û rayaumûmîya Almanya da ke vejîyê kuçeyan, çalakîyanê protestoyî bikerê, hukmatî rê teda bikerê. Goran Kobanêyî vat: ''Ciwanî wa vejîyê teber, kampanyaya îmzayan bidê destpêkerdene.''