Cergê DAÎŞî Mahmut Dundar 1993 de Semsûr de dadîya xo ra bîyo û Tirkîya de şinasîyeno. Dundarî koma 'Dokumacilar'î ya Semsûrî de ca girewt û bi nê hawayî tewrê DAÎŞî bi.

Koma Dokumacilar dima ke derbazê Sûrîye bîye, xeylêk endamê ci bîyî 'bombayê gandarî.' Mahmut Dundar û cinîya ci Merve Dundar, cêwîyê ci Omer Denîz Dundar û cinîya birayê ci ya kazake lîsteya bombayanê gandaran de ca gênê.

Dundar 24ê adara 2019î de Baxoz de teslîmê QSDyî bi. Mi çend reyî Dundarî reyde pêvînayîş kerd. Dundarî wina qala têkilîyanê Tirkîya-DAÎŞî kerde:

''DAÎŞî 2017 de dima ke dest pê xo apeyantişî kerd hînî Tirkîya sey wîlayetêkê xo dî. Yanî giranîye daye karanê Tirkîya ser. Sîstemê kar û rêxistinîye yê DAÎŞî verî girêdayeyê Karanê Teberî bi. La dima ke Tirkîya biye wîlayet hînî xoser bîye. DAÎŞî walîyêk ci rê tayîn kerd. No walî zî Heyetê Mufavada (Heyetê Leşkerî yo Berz) ra bi.

Walîyo verên ê Tirkîya Nusret Yilmaz (Ebu Fuday) bi ke no kes pabesteyê xalîfeyê nikayênî yê DAÎŞî Abdullah Kardaşî yo. Heta wefatê ci ez Nusret Yilmazî reyde xebitîya. Mergê ey ra dima Ebû Adil Turkmenî bi walîyê Tirkîya. Xora destpêkê 2017î ra nata DAÎŞî xeylêk emîrê xo şawitî Dîşîşa, Îdlîb û Tirkîya. Turkmenî dima bi emîrê Dêra Zorê.

Wextê Fudayî de mi têkilîya DAÎŞî-Tirkîya ardêne ca. Mi 20 ra zêdêr mesajê krîptoyî şawitî. Ma bi nameyanê kodan qisey kerdêne. Peynîya 2017î de mi eşnawit ke DAÎŞ Tirkîya de çalakîkerdiş qedexe kerd. Çunke çalakîyê vera Tirkîya dûştê menfaatanê ma bîyî. Dima ke Tirkîya bîya wîlayet karê çapemenîye zî kirişîyayî uca. Cara beno ke DAÎŞ peynî de bi temamî koçê Tirkîya yan zî nêzdîyê Tirkîya bikero.

Mabênê DAÎŞ û Erdoganî de 2017 ra nata cara pêkerdişêk esto. Erdogan Mûsil û Kerkûkî wazeno û wazeno xeylêk herêmanê Sûrîye zî bivisno destî. Hedefê ci 2023 o. Coka Erdogan wazeno DAÎŞ newe ra Sûrîye û Iraq de aktîf bibo. Ez pê bawer nîya ke Ewropa û Amerîka paştî bidê Erdoganî. Amerîka dima ke têkilîya Erdogan-DAÎŞî dîye paştdayîşê xo kêmînabi.''