Hetkarê Fermandarê Pêroyî yê Ceyş El Siwarî (Artêşa şorişgêran) Ahmet Sultanî (Ebu Araç) derheqê meseleyanê Idlib, Efrîn û Minbicî de ANFyî rê qisey kerd.

Sultanî vist vîrî ke Sûrîya de serewedartişê şarî  2011 de dest pêkerd û va: ‘‘Şar û şorişgêrê ke wiriştî lingan ser o zerra safî ra têkoşîn dayêne. O wext Artêşa Sûrîya ya Azade hêzêko şorişgêr bî. La pêra tirkîya çeteyê xo ûca de ca kerdî û şorişî rayîrê xo şaş kerd. Bado zî grûbê El Qaîde kewtî Idlibî. Serra 2014î de hêzanê şorişgêran DAÎŞ Idlib ra vet. Dewleta tirkî waşt ke hêzê ma yê şorişgêrî biaçarno xetê cihadîstan. Bi sebebo ke waştişê înan nêame ca Cephet El Nusra û tayî grubanê çeteyanê bînan vera hêzanê şorişgêran  şerr da destpêkerdene. Grûbê  OSO ke verî pîya bi ma têgêrayêne ê zî îxanetkar vejîyayî.‘‘

Sultanî qiseykerdişê xo wina domna:‘‘Rayberîya Cephet El Nusra de Fetih Şam ameyî ronayene. Serra 2015î de hemeyê Idlibî rejîm ra girewt û şarî rê zext kerd. Dekewtişê Rûsya yê Sûrîya ra dima zî her hetî ra xeylî hêzî bi pêkerdişanê cîya-cîyayan  Idlib de ameyî pêser û şar binateyê di adiran de  mend. Soçî de qerarê ke seba bêçekîya herême gerîyayî zî goreyê şarî nê, goreyê karê rejîmî yê. Xora çeteyanê Tirkîya pêkerdiş qebûl kerd la nêard ca. Ma wexto ke bi komploya tirkan Idlib ra vejîyayî, tayî grûbî şîyê Tirkîya la ma raştîya Tirkîya nas kerde coka ma nêşî. Ma şîyî Efrîn û xo newe ra ardî pêser.‘‘

Sultanî da zanayene ke ê seba DAÎŞî ra xelisnayîşê Şehbayî sey hêzêkê esasî tewrê operasyonî bî û wina dewam kerd: ‘‘ma 74-75 dewî azad kerdî. Nê demî de dewleta tirkî vejîyayî vera ma. Seba pawitişê DAÎŞî hêrîşê ma kerd. Coka ma nêeşkayî heme cayan azad bikerî. Cayê Efrîn û Şehba ke azad bî  cuyêka demokratîke estbi û şar keyfweş bi. Dewlata tirkî hêrişê Efrînî kerd û ma zî hêzanê QSDyî ra sey grûbêk vera îşxalê tirkan têkoşîn da.‘‘

Sultanî qiseykerdişê xo wina domna: ‘‘Tekîlîya ma bi Idlibî tim esta. Goreyê zanayîşo ke kewto destê ma, dewleta tirkî çeteyê xo sey grûbanê  Heyet Tahrîr Şam û qismêkê Partîya Îslam ya Turkîstanî Idlib ra kiriştî Efrînî. Nika zî wazena ke grûbanê bînan bero Efrîn û Şehba. Dewlata tirkî wazena ke Efrîn û Şehba de mende bo. Eke destê ci ra bêro Idlib de zî manena. Ganî heme Yewîya Miletan û Yewîya Ewropa vera qewimîyayîşanê Efrînî bêveng memano û cayê ci de tehqîqat virazo.‘‘

Sultanî qiseykerdişê xo wina qedîna: ‘‘zêdê ci Idlib, Hama û Hûmûsî ra  şerwanê ma estî û ma hêzêkê Sûrîya yê. Idlib, Şehba, Şed Tişrin û Reqa de ma vera DAÎŞî şerr kerd. Xoverdayîşê Efrînî de ma ca girewt. Bado zî ma şîyî Minbic. Nika ma pawitişê Minbicî de ca genî. Dewleta tirkî vera Minbicî şerrêko taybet dana la dekewtişê Minbicî yê OSO û hêzanê Tirkîya bêîmkan o.‘‘