Artêşa tirke ya îşxalkere cerganê xo reyde hêrişê xo yê vera Eyn Îsayî zêdînayî. Cinîyê Eyn Îsayî zî vera îşxalan xo ver danê.

Hetêkî ra Hêzê Sûrîyeya Demokratîke zî vera hêrişan bi xurtî xo ver danê. Artêşa tirkeya ke hêrişê dewanê Mealeq û Seyda kerdbi la nêeşkabî ser bikewa nika zî verê xo da dewanê Mişêrfe û Çelbê yê vakurê Eyn Îsayî.

Garantorê peymana adirbirnayîşî Rûsya û Amerîka vera hêrişan bêveng ê. Cinîyanê Eyn Îsayî ANFyî rê qisey kerd û da zanayene ke ê do vera îşxalê artêşa tirke QSDyî reyde xo ver danê.

Fadîle Mihemmed: ''Hêrişî mengêke ra nata vera doman û sivîlan dewam kenê. Rejîm û Rûsya çîyêk nêkenê.Têna QSD ma pawenê, vera hêrişan xo ver dano. Ganî dewleta tirke bêra vindartene.

Nîrane Hesen: ''Dewleta tirke kena ke şar bitersna, bida koçkerdene. La şar qerardar o ke keyeyê xo nêterikno. Şerwanê QSDyî xo ver danê û hêrişan kenê pûç. QSD heta ke ci ra yeno seba pawitişê şarî û asayîşî xo ver danê. Ma zî sey şarî vera îşxalanê tirkan xo ver danê.

Xetîce Adil: ''Ne xemê dewleta tirke yo ke sivîl ê yan zî leşker ê. Ê her ca danê bombayan ver. Dewleta tirke armanc kena ke ma erdê ma ra veja, erdê ma îşxal bikera û ê bînan tîya de ca bikera. Qaşo Rûsya tîya de ya, noqtayî awan kerdî û alayê xo vetî. La a zî çîyêk nêkena.''

Rêzan Mehmûd: ''Rûsya û rejîm têna hêrişan seyr kenê.Pêro merdimê ma hêrişan de zerar vînenê, nê hêrişî ekonomîya herême zî xeripnenê. Eyn Îsa cayêko qij o la girîng o. Coka hende beno hedefê hêrişan.''

Rana: ''Eyn Îsa tim dîyeno hêrişan ver û nê hêrişan de sivîlî zerar vînenê. Dewleta tirke ma tersnena ke ma tîya ra şorê. Rûsya qaşo ma pawitêne la çîyêk nêkena. Ganî ê bizanê ke ma do qet erdê xo nêteriknê û wayîrê Eyn Îsayî vejîyê.''

Makbûle: ''Dewleta tirke wazena Eyn Îsa veng bikera. Rûsya, Rejîm û tirkî pîya têgêrenê. No erd erdê ma yo, ê dewleta tirke nîyo. Ma do erdê xo war nêverdê.''