Endama Têgêrayîşê Azadîye yê Cinîyan ê Êzîdîyan ê Ewropa (TAJÊ-E) Cazya Husen Havrano, Menîfe Saît Cûma ya ke Tirbespîye ra tewrê rayraşîyayîşî bîya û endama Kongreya-Starî ya Dezgehê Keyeyanê Şehîdan Necah Gulo ard ziwan ke dayîkê Kurdî teyna nîyê.

Havrano: Cinîyê Kurdan ê ke xo ver ro danê teyna nîyê

Havrano ard ziwan ke, Rojawanî ra heta Amed a bi rêzdarî bejna xo verê çalakwananê grevê vêşanîye de û Leyla Guvene de kena çewt û vat, “Bi nameyê Meclîsê Cinîyan ê Êzidîyan vana; ma do heta peynîye înan reyde bibê û silam û hurmetanê xo înan rê şawena. Ma heta peynîye leyê xoverdayîşî de yê, ma do serê rêça Rayberê xo Abdullah Ocalanî û şehîdanê xo de bibê. Wa Erdogan bizano ke; dayîka Kurdî çar parçeyanê Kurdistan û Ewropa de zî teyna nîya.”

Cûma: Ma DAÎŞ bin kerd, ma do dewleta Tirkî ya faşîste zî bin bikerê

Menîfe Saît Cûma zî zulmê dewleta Tirkî yê vera dayîkan şermezar kerd û vat, “Sey her şarî ma wazenê Rayberê ma mîyanê ma de bo, ma reyde bo. Wa her kes vera nê zulmî bivejîyo û çi dest ra yeno bikero. Rojawanî de 11 hezar şehîdê ma estê, seba azadîya Rayber Apoyî, seba ameyîşê aşitîye, seba Leyla Guvene û hevalanê aye ma amede yê 11 hezar şehîdanê bînan bidê. Hêzê ma YPG û YPJ hîna zî vera dewleta Tirkî û dişmenanê merdimîye cephe de şer kenê. Ma DAÎŞ bin kerd, ma do dewleta Tirkî ya faşîste zî bin bikerê.”

Ma do dest xoverdayîşî ra vera nêdê

Endama Kongreya-Starî Necah Gulo zî vat, “Sey her wextî ma hevalanê xo yê ke grevê vêşanîye de yê rê wayîr bivejîyê. Hêzê mîyanneteweyî û dewletê Ewropa vera na bêhuqûqîye de bêveng ê, ma reyêka bîne şermezar kenê û vanê; bes o, êdî na bêvengîye caverdê. Ma do timî dayîkanê xo û domananê xo reyde bibê… Heta dilopa peyêne ya gonîya xo ma do dest xoverdayîşî ra vera nêdê. Ma do wareyan de bibê. Wa Erdogan naye bizano ke, ma senî ke DAÎŞ bin kerd, peynîya Erdoganî zî do bêra… Dayîkî do heta azadîya cimatî û Rayberê xo xo ver ro bidê.”