Fermandaranê Hêzanê Sûrîyeya Demokratîke (QSD) ra Baz Cindirêsî derheqê hêrişanê dewleta tirke yê vera Eyn Îsayî de ANFyî rê qisey kerd.

Cindirêsî da zanayene ke Eyn Îsa cayêko startejîk o, xeylêk rayîrê şaristanan ê bînan tira derbaz benê û vat: ''Vera dewanê Mealîk, Seîda, Mişerfê, rayîrê M4î xeylêk hêrişî yenê kerdene. Ê wazenê verî nê dewam bigêrê binê ablûqa û dima zî Eyn Îsa bi temamî îşxal bikerê. La QSDyî pêro xîretê îşxalkeran kerdî pûç.''

Cindirêsî îfade kerd ke 19ê adare de hêrişê giranêrî ameyî kerdene û dewa Seyda de 15 îşxalkerî kişîyayî. Cindirêsî eşkera kerd ke dewleta îşxalkere pê teyaranê şerî zî hêrişê hewayî kena.

Cindirêsî vat: ''Baregehê Tirkîya rayîrê M4î ra kîlometreyêke dûr ê. Ê wazenê rayîr bikerê binê kontrolê xo, çimanê ma bitersnê û herême veng bikerê. Dewijê Seîda û Mealîkî wextêkî ra dima newe agêraybî dewanê xo. Heta seba agêrayîşê înan ma Rûsya reyde qisey kerdbi. La key dewijî dekewtî herême Tirkîya dest pê hêrişan kerd. Rûsya vera nê hêrişan reyna bêveng a.''

Cindirêsî ard ziwan ke medyaya Rûsya û Şamî wina provakasyon kenê ke seke QSD Eyn Îsa do teslîmê înan bikerê. Cindirêsî vat: ''Nê pêro zûr ê. Rûsya wazena ma Eyn Îsa teslîmê Şamî bikerê la ma do qetî ney qebul nêkerê. Rûsya armanc kena ke Bass xurt bikera û kontrolê nê herêman pê destê Baasî bigêra binê kontrolê xo. Ma do heta peyêne şarê xo bipawê. Hêrişî hê dewam kenê. Tewirê ma zelal o. Ma do qet apey gamêke nêerze.''