Fatma Şabo qezaya Mabata ya Efrînî ra ya û 20ê çeleyê 2018î de wextê hêrişanê vera Efrînî de a endama Hêzanê Asayîşî bîye. Fatma Şabo wexto ke embazê xo yê birîndarî xelisnayêne esîr kewte. Îstîxbarat û cerganê dewleta tirke ci rê îşkence kerd.

3 mengan ra dima cerganê Sultan Muradî a verdaye û ci rê ajanîye ferz kerde. La aye no qebul nêkerd û reyna tewra Hêzanê Asayîşî bîye.

Fatma Şabo da zanayene ke cergî û îstîxbaratî zîndanan de pê îşkenceyî esîran rê ajanîye ferz kenê. Fatma vat: ''Înan verî ez berda Tirkîya. Uca de înan îfadeyê mi girewt û mi rê îşkence kerd. Mi cewab nêda persanê înan. Înan vatbi do mi bikişê. Dima ez ameya berdene bi zîndanê cerganê Sultan Muradî. Înan vat leşkerê dewleta tirke do reyna bêrê û eke ez cewab nêda persanê înan mi bikişê. Axir ê reyna ameyî la mi ancî cewab nêda persanê înan. Armancê înan şiknayîşê îradeyî bi, teslîmgirewtiş bi. Înan pê îşkenceyî tay embazê ma zî şehîd kerdî.

Înan dima ma verdayî û waşt ke ma înan rê ajanîye bikerê. La ma nêkerde. Ez şîya Efrîn. Mi keyeyê xo 10 rojan ra dima dî. Hînî Efrîn nêmendbi. Ez vejîya şîya Şehba. Uca ra ma derbazê Helebî bîyî.

Înan pê hende îşkenceyî waştbi ke îradeyê ma bişiknê ma bêhêz bikerê. La eqsê ci ma hîna bîyî biîrade û xurtêr.''