Hêrişê dewleta tirke yê vera Eyn Îsayî dewam kenê. Heta nika 6 dewê Eyn Îsayî hêrişan de bi temamî rijîyayî. Hêrişî bi taybetî vera malanê sivîlan yenê kerdene. Dewê  Hoşan, Mielleq, Xalîdiye, Mişerfe, Cehbel, Seyda û Dîbîsê tim benê hedefêr hêrişê dewleta tirke ya îşxalkere.

Dewa Dîbîsê tim bena hedefa hêrişan. Dewijî rixmê pêro hêrişan zî dewa xo nêteriknenê. Dewleta tirke ya îşxalkera ke baregehê ci qasê kîlometreyêkî dewe ra dûr a tim dewijan kena hedef. 

Dewa Dîbîsê ra Fatma eşkera kena ke hêrişan ra ê neçare mendî ke teber de bimanê û vat: ''Nemeyê şewe hawanî erzîyenê keyeyê ma ser. Keyeyê ma pêro vêşayî. Ma vanê hînî bes o. Ma nêeşkenê hema keyeyê xo de bi hawayêkê biasayîşî bimanê.  Erdogan ma û domananê ma ra çi wazeno?''

Muhammed Îsayî zî ard ziwan ke vera înan hêriş û zorbazîye yena kerdene û vat: ''Nişka ra pê topan hêrişê ma kenê. Her çîyê ma şîyo. Hêrişanê dewleta tirke ra verî ma herêma xo de asan bîyî. Key ê ameyî aramîya ma nêmenda. Yenê topan erzenê ma ser. Hînî wa peynîya ney bêra. Ma wazenê keyeyê xo de, dewa xo de bi hawayêkê aramî biciwîyê.''

Ayşe Mihemed pare kerd ke rewşa kênaya ci ya astengdare hêrişan de bîya giranêr û vat: ''Psîkolojîya domananê mi bîya xirab. Kênaya mi astengdar a, hêrişan ra semed rewşa ci bîya xirabêr. Hêrişê peyênî de a sereyê xo ra bîye birîndar. Hînî ma nêzanenê se bikerê. Ameyî verê berê ma, ma rê zulm kenê. Înan dewa ma de aramîye nêverdaya.''