Bi se hezaran koçberî îşxalê dewleta tirke yê vera Serêkanîyê û Til Temirî de neçare mendî ke koç bikerê. Koçberî şaristananê derûdoran de û Kampa Waşokanî ya vakurê Hesekê de mîyanê zorî û zehmetîyan de ciwîyenê.

Binê 1.460 xeymanê Kampa Waşokanî de 8.635 kesî manenê û 3 hezar û 520ê ci doman ê. Domanê ke warê xo rê koç kerd hetêkî ra hetkarîya keyeyanê xo kenê ke warêkê cuye awan bikerê, hetêkî ra zî xîret kenê ke travmaya barbarîya ke dîye xo vîrî ra bikerê. Domanî bi hêvîya agêrayîşê şaristananê xo embazanê xo de kay kenê û vanê êyê ke şaristanê înan îşxal kerdî cade tira bivejîyê.

Can Huseyîno ke 9 serre yo keyeyê xo reyde Serêkanîyê ra koçê kampa Waşokanî kerd vano ke ê wazenê abigêrê: ''Mi bêrîya embazanê xo reyde kaykerdiş kerd. Wazena şora dibistane. Eke cergî bivejîyê ma do abigêrê keyeyê xo.''

Mexdûranê îşxalê dewleta tirke ra Bêrîtan û Cemîl way û birayê yewbînan ê. Bêrîtane wexto ke nameyê Serêkanîyê eşnawena zerrîzîz bena.

Cemîl zî tesîrê na rewşa xirabe de yo. Cemîl xo nêzdîyê kamera keno û vano: ''Ez nêwazena kampe de bimana, ez keyeyê xo wazena. Se beno wa bibo ma do abigêrê Serêkanîyê.''

Bêrîtane zî wexto ke kamera vînena nêeşkena qisey bikera û têna hûyena. La hema zî şoqê serebûtanê ke ameyî înan ser rîyê înan de aseno. Ma kampe de şinê û ma rastê Mey yenê.

Meye Ehmed Kinar 8 serrî yaa û sey domananê bînan barbarîya dewleta tirke ra Waşokanî de ca bîya. Meye vana: ''Wa keyeyê ma ra bivejîyê. Uca keyeyê ma yo. Eşyayê ma uca de mendî. Ma nika xeyman de ciwîyenê. Ma do key abigêrê keyeyê xo?''

Ehmed Farîso 6 serre keyeyê xo reyde Waşokanî de maneno. Ehmed pabeyê agêrayîşê keyeyê xo yo û vano: ''No ca warê ma nîyo. Ez dewa xowazena.''