Fermandarê Pêroyî yê QSDyî Mazlûm Ebdîyî hesabê xo yê twitterî ser o eşkerayîyêke daye û vat: ''Tirkîya hema zî huqûqê mîyanneteweyî û peymananê 17 û 22ê teşrîna verêne binpay kena ke nê peymanî pê paştdayîşê Hetkarê Serekê DYA Mika Pence û Serekdewletê Rûsya Vlademîr Putinî ra ameyî amadekerdene û derheqê vindartişê hêrişanê dewleta tirke yê vera herême de yê.

Ebdîyî ard ziwan ke vindartişê polîtîkayanê pakîya etnîke û binpaykerdişê Tirkîya çarçewa peymananê teşrîna verêne û huqûqê mîyanneteweyî de wezîfe û mesuldarîya Amerîka û Rûsya yo.

Fermandarê Pêroyî yê Qsdyî Mazlûm Ebdîyî bale ante hêrişanê dewleta tirke yê vera dewa Helincê ya Kobanê ser û vat: ''Serrgêra 5. ya qirkerdişê serra 2015î ra verî ke nê qirkerdişî de 271 cinîyî, kokim û domanî kişîyayî, hêrişê vera dewa Helincê ya Kobanê dewamê polîtîkaya qirkerdişanê vera kurdan o.''