Rêxistina Heqanê Merdiman a Efrînî bîlançoya sûcanê dewleta tirke yê vera Efrînî eşkera kerde. Eşkerayîya ke Kampa Serdemî ya Şehpa de ameye kerdene xeylêk kesî tewrê ci bîyî. Eşkerayîye de ame vîrardene ke 300 hezar kesî rîyê hêrişanê îşxalî ra erdê xo ra vejîyayî.

Demografî ameye bedilnayene

Eşkerayîye de bale ameye ser antene ke demokrafîya Efrînî ameye bedilnaye û ame vatene ke nameyê xeylêk meydan û dewanê ke kurdkî bî sey tirkî ameyî bedilnayene. Reyna mekteban de perwerdeyo tirkî û kincanê wendekaran de beyraqa tirkî bîyî mecburî. Hemwelatîyê Sûrîye mecburê ke nasnameyê tirkî bikirişê.

Qirkerdişê sîvîlî

Eşkerayîye de nê ameyî vatene: ''Demê îşxalî ra nata 7 hezar û 343 sîvîlî ameyî remnayene û aqibetê xeylêk sîvîlan hema zî nîno zanayene. Semedê veradayîşê sîvîlanê kurdan ê ke yenê remnayene fîdye yeno waştene. Hîrê serranê peyênan de Efrîn de 674 sîvîlî ameyî qetilkerdene ke înan ra 82 kesî netîceya îşkenceyanê giranan de merdî. 65 cinîyî ameyî qetilkerdene û 5 cinîyan zî xo kişt. Vera 68 cinîyan sûcê giranî ameyî kerdene.  Rîyê hêrişanê îşxalî yê dewleta tirke ra 696 sîvîlî birîndar bîyî. 303ê înan doman û 213ê înan zî cinîyî bî. Netîceya teqayîşê mayînan de Efrîn de 2 hezar 17 kesî birîndar bîyî.

Qirkerdişê vera xoza

314 hezar 400 darê zeytînan ameyî birnayene û kolîyê înan ameyî rotene. 11 hektarê erazîya ramitişî ameyî tafînayene. 75 cayê tarîxî hetê çetayan ra ameyî talankerdene. 15 cayanê dinî rê zirar ame dayene. Çeteyan eserê tarîxî teberê Efrînî rotî.

Bîlançoya 2020î

8ê înan cinîyî 58 kesî ameyî kiştene. 92ê înan cinîyî 987  kesî ameyî remnayene. 50 mekanê tarîxî ameyî texrîpkerdene. Binê nameyê xebata viraştişê rayîrî de 72 darê zeytînan ameyî birnayene. 250 keyeyî ameyî destsernayene û keyeyê çeteyan tede ameyî cakerdene. 39 teqayîşanê Efrinî de 170 kesî birîndar bîyî yan zî merdî.''

Vengdayîş

Eşkerayîye de veng dîya Rêxistina Heqanê Merdiman a Neteweyê Yewbîyayeyî, UNICEF û UNESCOyî ke wa şirê dewleta tirke ser ke hêrişanê xo vindarno. Reyna rêxisitinanê huqûqî ra zî ame waştene wa semedê belgekerdişê  sûcanê vera Efrînî û hesabpersayîşî têbigerê. Ame waştene ke wa dewleta tirke warê mîyanneteweyî de bêro hukmkerdene û heme berpîrsîyaran ra hesab bêro persayene.