Goreyê melumato ke ameyo girewtene, dewleta tirkî cayê ke Vakurê Sûrîye û Rojawan de dagîr kerdî de dest bi vilakerdişê nasnameyanê xo kerda.

Çimeyê herêmî dîyar kerdî ke nasnameyê ke yenî vila kerdene, hetêkê ci bi tirkî yo, heto bîn zî erebkî yo û nê nasnameyî dîyenî ajan û kesê ke xizmetê dagîrkerîye kenî.

Nê kartan ra yew zî Cindirês de ame dîyayene. No kart, kartê endamtîye yê Meclîsê Herêmî yê Cindirêsî yo û beyraqa tirkan kartî ser o esta.

Dewleta tirkî hewl dana cayê ke dagîr kerdî de estena xo mende bikera. Rejîmê Anqara hetêk ra hemwelatîyanê herême dano koç kerdene, heto bîn de zî çete û tayê keyeyan herinda hemwelatîyan de ca keno.

Goreyê xeberê ke aşma adare de medyaya tirkan de vejîyayî; Erdogan wazeno walîyan tayînê Efrîn û tayê herêmanê bînan bikero. Reyna amebî îdîa kerdene ke dewleta tirkî weçînayîşê peyênî de nasname dayo bextwaştoxan û bi înan rayî dayî bikar ardene.

Hêrişê dagîrkerdişê Efrînî 20ê çileyî de dest pêkerdbî û 18ê adare de merkezê bajarî bitemamî amebi dagîr kerdene. O wext ra nata Efrîn de neheqîyî her ke şono zêde benî. Înfaz, îşkence, xesp, talan, tacîz û tecawizî Efrîn de kêmî nêbenî.

Rêxistina Efû ya Mîyanneteweyî zî aşma tebaxe de îzehetêk daye û dîyar kerde ke Efrîn de neheqîyî zaf î û nînan ra Tirkîya berpirsîyar a. Rêxistine hezîrane de zî raporêk aşkere kerdbî û vatbî, mal û milkê kurdan yenî talan kerdene.