Serekê Rêxistina Heqanê Merdiman a Efrînî Îbrahîm Şêxoyî derheqê kerdişanê dewleta tirke  de ANFyî rê qisey kerd.

Şêxoyî pare kerd ke dewleta tirke û Serekê SMDKyî Nasir El Harîrîyî pîya komîteyêke awan kerde û wina mojnenê ke ê hê sûcanê merdimîye û şexsî ceza kenê.' La na komîte sercergan ra yena meydana û Efrîn de  tira pey sûcê vera merdimîye zêdîyayî.

Şêxoyî vat: ''Efrîn de verî aramî û haştîye estbî nika têna kiştiş û xirabî estê. Efrîn de qaşo meclîsê sivîlî awan bîyî la nê meclîsî pabesteyê Hatayî yê. Raporê Neteweyanê Yewbîyayeyan (NY) zî mojnenê ke dewleta tirke Efrîn, Girê Sipî û Serêkanîyê de sûcanê şerî kena. Dewleta tirke seba ke xo pakî bomjna Serekê Koalîsyonê Şorişgêr û Muxalîfî yê Sûrîye (SMDKO) Nasir El Harîrîyî reyde Efrîn de komîteyêke awan kerde. Ê pê zorî Efrîn de tay kurdan vejenê verê kamerayan. Nê pêro seba xapînayîşê rayaumûmî yê.''

Şêxoyî wina dewam kerd: ''Na komîteya El Harîrîyî de cergê Sultan Muradî, Cephet Şamî estê ke nê cergî Efrîn de şarî rê zulmî kenê. Harîrîyî ra dima Efrîn de kişîyayîş, talan, remnayîş, tecawuzî zêdîyayî.''

Şêxoyî eşkera kerd ke Efrîn hetê Walîyê Hatayî ra îdare beno û vat: ''Walî her menge yeno kontrolan keno, plansazîyan keno. Efrîn de perwerde bi tirkî yo, dezgehê tirkî estê, alaya tirkan û fotografê Erdoganî estê. Eke kesêk nê çîyan rexne bikero ceza dîyena ci. Dewleta tirke Efrîn vurna merkezê terorî. Rewşa nikayêne ya Efrînî seba pêro dinya gefêk a.''