Dewleta tirke ya îşxalkere cerganê xo reyde 2 serrî verê cû Efrîn îşxal kerd. Goreyê Rêxistina Heqanê Merdiman pakîya etnîke ra nufusê kurdan  se ra 18î. Îşxalkeran bi zorî 300 hezar merdimî dayî koçkerdene. 553 sivîlî ameyî qetilkerdene ke înan ra 55 kesî bi îşkence qetil bîyî. 6 hezar û 200 sivîlî ameyî remnayene û 3 hezar û 400ê înan ra xebere nêna girewtene. 61 cinîyî maruzê tecawuzî bîyî.  Dewleta tirke hêrişê cayanê fîrazan, tarîxîyan, xozayî zî kerd. Goreyê raporî; 200 hezar zeytûnêrî ameyî birnayene, 11 hezar hektar cayê gemî ameyî vêşnayene, 75 cayê tarîxî ameyî talankerdene.

Hemsereka Îdareyê Xoserî ya Efrînî Şîraze Hemo vist vîrî ke îşxalê dewleta tirke serrgêra diyîne de zî dewam keno. Şîraze Hemo vat: ''Dewleta tirke wazena pêro Rojhelatê Mîyanênî îşxal bikera. La seba ke Sûrîye de kurdî estê û projeyê neteweyê demokratîkî tîya de ameyêne caardene hêverî verê xo da erdê Sûrîye.''

Şîraze Hemo ard ziwan ke dewleta tirke xîret kerdêne ke demografîyê Rojawanî bivurna. Şîraze vat: ''Şarê Efrînî bire daye ke vera îşxalî xo ver bidê. Xoverdayîşê Kelaya Dimdimî xo rê kerd mîsalêk. 58 rojan vera sîstemê çekan ê averan ê NATOyî xo ver da. La peynî de neçare mend ke koç bikero. Reyna zî şarê Efrînî  eşkera kerd ke ê do cuya xo ya azade ra fek vera nêdê, rojêke do abigêrê keyeyanê xo û wayîrê ci bivejîyê.

Bira şarê Efrînî na ya; çunke Efrîn ê ma yo. Şarê Efrînî Şehba de zî komunê xo, meclîsê xo awan kerdî. Şarî bi çalakîyanê xo, karanê xo yê dîplomatîkan kerdişê dewleta tirke, vurnayîşê demografîyî mojna dinya. Kiştişê domanan ê Til Rifatî, kiştişê keyeyêkê Aqîbe, qirkerdişê dewa Kûlete sûcê şerî yê dewleta tirke yê. Kerdişê dewleta tirke vera merdimîye yê. Ma zî sey Îdareyê Xoserî û şarê Efrînî rayaumûmîya mîyanneteweyîye rê vanê Efrîn ê şarê Efrînî yo. Ma soz danê şarê xo ke ma do vengê şarê Efrînî biresnê temamîya dinya û seba ci têkoşîn bikerê.''