Enternasyonalîstanê ke 20 welatanê sey Meksîka, Îngilîstan, Amerîka û Fransa ra ameyî Rojawan de têkoşîn kenê ANFyî rê qisey kerd û bale ante tehlukeyanê vera Rojawanî ser.

Şerzan Morayo ke Meksîka ra yo 2 serrî verî ameyo Rojawan. Şerzanî vat: ''Wexto ke ez verî ameya Rojawan ê çaxî ra nata zaf çîyî qewimîyayê. Mîsal ma nika vera dewleta tirke şer kenê. Tîya de têna şer nê şorişê cinîyan, şorişê komelî esto. Tîya de rixmê zehmetîye zaf rindîyî estê. Seba paştdayîşî kam eşkeno wa bêro tîya. Nêro zî wa medyaya dîjîtale ser o paştî bido ma û tedaya dewleta tirke bikero.''

Şoreş Qereçoxo ke Îngilîstanî ra yo newe ameyo Rojawan û Tabûrê Enternasyonalîstan ê YPGyî de yo. Şreşî vat: ''2 mengî verî ez ameya. Mi dî ke dewleta tirke hêrişê sivîlan kena, her cayî dana bombayan ver. Îradeyê şarî zaf tesîrê mi kerd, şar rixmê pêro hêrişan xo ver dano. Ganî Îngilîstan û welatê bînî hetkarîya Rojawanî bikerê, çalakîyanê paştdayîşî bikerê. Ganî derheqê kerdişanê dewleta tirke de agahîyî bêrê dayene. Ciwanî tewrê karan bibê, bêrê tîya. Eke nêeşkê zî wa medyaya dîjîtale ser o ma teqîb bikerê û paştî bidê ma. Wa bala rayaumûmîye biancê Rojawanî ser.''

Faysel Derwîşo ke Amerîka ra yo, 4 mengî yo Rojawan de yo. Fayselî vat: ''Tîya de twr zaf têkilîya şorişî ya bi şarî tesîrê mi kerd. Tîya de pêlê demokrasî esto. Corî ra yew sîstem şarî rê nêameyo ferzkerdene. Ez pê bawer a ke ma tîya de qewimîyayîşanê zaf girîngan bivînê. Merdim nê hêzê şorişî ra hêz gêno û vera îşxalkeran û emperyalîzmî rolêkê pîlî kay keno.''

Şerwan Hogiro ke Fransa ra yo vat: ''Ez seba ke tewrê xoverdayîşê vera dewleta tirke biba ameya tîya. Dewleta tirke Efrîn îşxal û talan kerd, Iraq de zî çeka kîmyewîye şuxilnena. Rayber Apo 22 serrî yo tecrîd de yo. Ganî ma pê têkoşînê xo sûcanê Erdogan û hukmatê ci eşkera bikerê. DAÎŞ hema zî Rojawanî rê gefan waneno. Coka ez tewrê YPGyî bîya. Rojawan de çîyê zaf rindî qewimîyenê. Seba ke hêrişan ra nê rindîyî bêrê pawitine ganî ma têkoşîn bikerê.''