Dima ke DAÎŞ hetê QSDyî ra ame çinkerdene dewleta tirke bi nameyê 'Artêşa Azade' artêşêka newîye ya cergan Sûrîye de awan kerde. Şêxanê eşîranê Reqa da zanayene ke QSD û Îdareyê Xoserî ra berî erdê xo de hêzêko bîn nêwazenê.

Şêxê Eşîra Sapxa Mihemed Turkîyî vat: ''Dewleta tirke xîret kena ke fîtne dekera mîyanê ma. Erdoganî cergê xo ardî û tîya de ca kerdî. Welatê ma vêşan. Ma rê wazenê ke ma paştî bidê înan. La ma hetê QSDyî de yê û ma paştî nêdanê hêzêkê bînî. QSD seba pawitişê erdê ma şer keno. Şêxê eşîranê Dêra Zorê benê hedef ke paştî danê QSD. Dewleta tirke ma ra ecîz a.Welatê ma seba pawitişê erdê ma hetê QSDyî de yê. Ma zî rixmê zor û zehmetîyan zî tim do hetê QSDyî de bibê.''

Şêxê eşîra Welde Remeza El Rihelî vat: ''Dewleta tirke Sûrîye talan û îşxal kena. Nika Sûrîye de sey Hevrîne Xelef qirkerdişan kenê, tecawuzê domananê 16 serreyan kenê. Nê pêro dima ke Erdogan ame qewimîyayî. Erdogan demografîya herêma ma vurneno. Merdimê xerîbî cayê ma de ca kerdî. Ez venga her kesî dana ke wa kincê 'Artêşa Azade' xo rê nêkero, kurdan meremno û zulmê kurdan mekero. Wa QSDyî reyde û welatê xo de biciwîyê. Eke Erdogan şêro ma do ser bikewê. Kurd, êzidî, sûryanî pêro domanê ma yê. Bêrê ma pîya welatê xo bipawê û destûr nêdê kayanê gemarinan.''

Şêxê eşîra El Beryecê Huseyîn El Bercesî vat: ''Hînî wextê ci ameyo ke ma verê zulmê dewleta tirke bigêrê. QSDyî ma cergan ra xelisna. Nika zî QSDyî rê vanê terorîst labelê terorîst bi xo dewleta tirke ya. A terorîstan perwerde kena, wayîra înan vejîyena. Ma venga pêro dinya danê ke terorîzmê dewleta tirke yê vera Sûrîye bivîna. Nika zî binê nameyê 'Artêşa Azade' de cerganê xo perwerde kenê. Ma nêwazenê dewleta tirke bikewa welatê ma. Oyo ke dewleta ma paweno QSD yo. Ma do heta peynî paştî bidê QSD.''