Hemserekê Îdareyê Petrolî yê Îdareyê Xoserî yê Vakur û Rojakewtena Sûrîye Saad Xidir Essafî û vervatoxê Îdareyê Xoserî yê Vakur û Rojakewtena Sûrîye Loqman Ehmê cewab da îdîayanê serekê Amerîka Trumpî.

Hemserekê Îdareyê Petrolî yê Îdareyê Xoserî yê Vakur û Rojakewtena Sûrîye Saad Xidir Essafî ard vîrî ke qismêko zafane yê petrolî Dêra Zor ra yeno vetene û vat: “Seke vajîyeno hal û îmkanê ma çinyo ke ma petrol bikar bîyarê yan zî vejê teber. Ma tena eşkenê qaso ke îhtîyacîyanê xo yê rojaneyan pê bica bîyarê petrol vejê.” 

'ÎRANÎ DIR TU SÎNOR Û TÎCARETÊ MA ÇINYO'

Essafî nê vatî: “Ne binawanîyêka ma ya teknîkî ke ma petrolî bazarê mîyanneteweyî de biroşê esta û ne zî şîrketê ma yê petrolî yê ke nê petrolî biroşê estê. Yewna çî zî ware hewna zî wareyê pêkewtişan o. Nika ma het de vetişê petrolo ke îhtîyacîyanê şarê ma bica bîyaro zî serfirazîyêk a.

Eke ma bêrê serê meseleyê rotişê petrolî bi Îranî, ne sînorêk ma ne zî nizdbîyayîşêkê ma yê tîcarî Îranî dir esto. No mumkun nêyo. Herême de tu şîrketêkê petrolî yê Îranî zî çinyo ke têkilîyêka ma ya tîcarî Îranî dir virazîyo.”

'BENO KE TRUMP XELET AMEYO HAYÎDARKERDENE'

Vervatoxê Îdareyê Xoserî yê Vakur û Rojakewtena Sûrîye Loqman Ehmê zî derheqê meseleyî de nê vatî: “Tu sînorêk ma yan zî berêk ma Îranî dir çinyo. Ma eşkenê vajê ke eşkerayîya birêz Trumpî ca de nêya û beno ke xelet ameyo hayîdarkerdene. Nika Sûrîye de ke şer dewam keno tena Îranî rê nê şima kamcîn welatî rê petrol biroşê no sûcêko mîyanneteweyî to. Tu hal û planêkê ma çinêbîyo ke ma petrolî biroşê teber.”