Gefanê Erdoganî ra dima hêrişê vera Til Temir, Eyn Îsa û Minbicî zêdîyayî.  Fermandaranê QSDyî yê Girê Sipî ra Baz Cindirêsî derheqê hêrişanê dewleta tirke ya îşxalkere de ANFyî rê qisey kerd.

Cindirêsî îfade kerd ke dewleta tirke waranê xeta cepheyî de pê konvoyan têgêrena û vat: ''Eşkera yo ke dewleta tirke amadekarîya hêrişan kena. Xora ê nika bêmabên hêrişê Herêmanê Pawitişî yê Medya kenê. Dewleta tirke tîya de bi giranî ha bin kewena coka wazena pê hêrişanê vera Rojawanî ney binimna. Efrîn, Serêkanîyê û Girê Sipî de nêrazîbîyayîşê şarî zêdîyeno. Lîbya de zî waştişê înan nêbîyî. Nê sebeban ra dewleta tirke zêdêr teng bîye.

Şerê vera DAÎŞî ra dima QSDyî hêzê xo prosesêkê perwerdeyî ra derbaz kerdî. Hêzanê QSDyî teknîk û teçhîzatê şerî ser o perwerde dî. Coka hêzanê ma vera her tewir hêrişî xo amade kerd. Dewleta tirke Eyn Îsayî ra heta Til Temir, Minbic û Şehba bombardumanê xo rê dewam kena. Nê hêrişî raşta raşte vera sivîlan ê. Dewleta tirke bi nê hawayî qanûnan binpay kena. Hêrişanê Tirkîya de heta nika bi desan sivîlî merdî û bi hezaran sivîlî erdê xo ra bîyî. Ê bi taybetî zî nê hêrişan de keyeyanê welatperweran kenê hedef. Coka wa welatperwerî hayîya xo bibê.''

Fermandaranê QSDyî yê Girê Sipî ra Baz Cindirêsî da zanayene ke rejîmê Şamî hêrişanê dewleta tirke ra dima dest pê propaganda kerd û vat: ''Medyaya rejîmî bi nê propagandayan şerê psîkolojîkî kena û vana 'QSD nêeşkeno şima bipawo, derbazê hetê rejîmî bibê.' La şarê ma hol zaneno ke eke ê cayî zî bêrê îşxalkerdene hînî ca nêmaneno ke şar şêro ci. Coka şarê ma paştî dano QSDyî. Şarê ma tek hêzê ma yê moralî yo. Eke şar û QSD bibê yew hînî erdê ma xelisîyeno.''