Firtineyê Cizîrî de merhaleyo peyên dest pêkerd

Hêzê Sûrîyeya Demokratîke (QSD) vera çeteyanê DAÎŞî de Hemleya Firtineyê Cizîrî de dest bi merheleyo peyên kerd. Hedef de beldeyê Hecînî yê sînorê Îraqî esto.

QSDyî qezaya Şedadê ya Kantonê Hesekê de bi eşkerayîya çapemenîye da eşnawitene ke înan dest bi operasyonî kerdo. Xeylê fermandaranê QSDyî û rayberê eşîranê herême tewrê eşkerayî bîyî.

Eşkerayî de nê zanayîşî ameyî dayene:

“Par hêzanê ma seba azadkerdişê herêma Dêrazor û Hesekê dest bi Hemleya Firtineyê Cizîrî kerdbi. Na çarçewa de bi hêzê Koordînasyonê Koalîsyonê Mîyanneteweyî operasyonê hewayî û bejayî viraştî. Netîceyê operasyonan de bi hezaran sivîlî destê çeteyanê DAÎŞî ra ameyî xelisnayene, bi seyan dewî û her di bajaran de warêko gird ame azad kerdene. Tena herêma Hecînî destê çeteyan de menda.

 

Dewamê eşkerayî de ca dîyayo nînan:

“Hêzanê ma rojhelatê Çemê Firatî de, bi hedefê çinkerdişê rêxistina terorî ya DAÎŞî 10ê êlula 2018î de dest bi merheleyo peyên yê hemle kerd. Hedefê ma de azadkerdişê Hecînî, dewê El Sosa, El Şefa û dormeyê ci esto. Bi azadkerdişê na herême do Hemleya Firtineyê Cizîrî bêro qedênayene.”

QSDyî dîyar kerd ke Meclîsê Leşkerî yê Dêrazorî, Yewbîyayîşê Hêzê Pawitişî yê Sînorî, Tugayê Taybetî yê YPG û YPJyî û hêzê Koalîsyonê Mîyanneteweyî bi teyarayanê xo yê şerî operasyonî de ca gênê. Reyna arteşa Îraqî zî paştî dana ci.

‘SEBA SIVÎLAN KORÎDORÊ MERDIMÎ AME AKERDENE’

Eşkerayî bi nê vatişan qedîyaye:

“Ma sey Hêzê Sûrîyeya Demokratîke qerarin ê ke ma berpirsîyarîya xo ya merdimîye anê ca û rojhelatê Firatî de terorî qedênenê. Na çarçewa de hêzanê ma nizdîyê beldeya El Bhera de seba xelisnayîşê sivîlan korîdorê merdimî akerda û seba caardişê lazimîya weşî û lojîstîkî kampêk ameya awan kerdene. Kesê ke ameyî remnayene û aqubetê înan nîno zanayene, seba înan zî xebatê ma domîyenî.”