Endama Konseya Rayberdişî ya PYDyî Hedîye Yusuf Newroze, îşxalê Efrînî û babetê bînî ANFyî rê ercnayî.

Qiseykerdişê Hedîye Yusuf ra beşêk wina yo:

''Menga adare de Roja Cinîyan, Qirkerdişê 12-16ê Adare, Newroze û Hewteyê Çêrîye estê. Coka adare kurdan rê menga xoverdayîşî ya. Ewro sey Şorişê Rojawanî kurdî wayîrê destkewteyan ê girîngan ê. Modelê Şorişê Rojawanî pêro dinya rê beno mîsal û numûne. Modernîteya kapîtalîste zî hetêkî ra xîret kena  ke Şorişê Rojawanî û Îdareyê Xoserî çin bikera.

Dewleta tirke Girê Sipî, Efrîn û Serêkanîyê îşxal kerdî, qirkerdişî kerdî, sivîlî kiştî û 1 mîlyon merdimî pê zorî dayî koçkerdene. Armancê Tirkîya şiknayîşê îradeyê Îdareyê Xoserî yo. La nêeşkaye. Îdareyo Xoser ho payan ser o yo.

Coka sîstemo kapîtalîst û hêzê kapîtalîstî alternatîfê bînî ceribnenê; ê kenê ke Îdareyê Xoserî bivurnê.  Mîsal israrê înan ê seba ENKSî sebebê ney o. Ê wazenê ENKS bibê hemparê sîstemê ma û herême de neteperwerîye aver şora.

Zîyaretê Hewlêrî yê Nasir Harîrîyî, hekmarîya keyeyê Barzanîyî yê bi ey, planê înan ê hemparî  şerê vera Îdareyê Xoserî keno xurtêr. Harîrîyo ke serekê cergan ê îşxalkeran o, Hewlêr de Barzanîyî reyde ronişeno û ameyoxê Îdareyê Xoserî nîqaş keno. No nêno qebulkerdene. Kiştoxê kurdan o winasên senî eşkeno îdareyê xoserî ser o nîqaşan bikero. No planê îmhaya kurdan ê azadan o.

Mesûd Barzanîyî herinda ke Harîrî def bikero verar şi ci. Serrgêra îşxalê Efrînî de no zîyaret qewimîya. Pêvînayîşê Mesûd Barzanî û Nasir Harîrîyî tesdîqkerdişê planê çinkerdişê kurdê azadî û îşxalê Efrînî yo. No verarkerdiş yeno a mana ke Barzanî Harîrî semedê îşxalê Efrînî tebrîk keno. Harîrî mesuldarê îşxalan û qetilkerdişê Hevrîne Xelef o.

Harîrî 18ê Adare de serrgêra îşxalê Efrînî de Hewlêr de do bêro qebulkerdene.  No yeno çi mana? Yanî Barzanî nê îşxalî tesdîq keno.

ENKS wazeno wa peymanê komelkî newe ra bêrê ercnayene, sîstemê perwerdeyî bivurîyo, sîstemê perwerdeyî yê rejîmî esas bibo, hêzê xopawitişî bêrê wedaritene û Rojawan PKKyî reyde têkilîya xo bibirno. ENKS vano ancax o çax ê tewrê îdareyî benê. Yanî ENKS wazeno sîstemê demokratîkî yê kurdan wedarno û cuya azade asteng bikero.

Yewîya neteweyîye pabesteyê ENKSî nîya. Çunke yewîye yewîya kurdan a yewîya partîyan nîya. Wa şarê ma vera têgêrayîşanê ENKSî hayîdar bo.

Tirkîya hêrişê Rojawan, Şingal û Herêmanê Pawitişê medya kena. Hêrişê vera Şingalî hêrişê vera Rojawanî yê. Yeno armanckerdene ke Şingalî ser o Rojawan bêro hedefkerdene. Herêma Kurdîstanî eke nê hêrişan tesdîq kena hêrişanê vera Rojawanî zî tesdîq kena.

Peymana Katar, Lavrov (Rûsya) û Tirkîya ya vera Efrînî vera demokrasî û şaranê Sûrîye ya. Ê wazenê Efrîn de îşxalê xo mende bikerê û krîzê Sûrîye xorinêr bikerê. Şarê Sûrîye vera nînan baldar bibê û hetê QSD û Îdareyê Xoserî de ca bigêrê.

Qirkerdişo ke dewleta tirke Efrîn de kerd deşîsfre bîyo. Tirkîya pê tay rojnamegeran kena ke sûcanê xo mîyan bikera. Efrîn de merdimî kişîyayî, cinîyî maruzê tecawuz û remnayîşan bîyî, xoza ameye talankerdene, eserê tarîxî ameyî remnayene û merdimî neçare mendî ke koç bikerê. Dewleta tirke Efrîn de sey DAÎŞ têgêrena.

Bi wesîleya îşxalê Efrînî ez venga pêro şar û dostanê ma dana ke wa wayîrê Efrînî vejîyê. Ganî ma verê ci bigêrê ke dewleta tirke îşxalê xo meşrû nêkerê û demografîya herême mevurnê. Ma ganî bikerê ke îşxalkerî Efrînî ra vejîyê û efrînijî abigêrrê. Ganî ma îdareyê xoserî yê Şingal û Rojawanî bipawê.''