Hemwelatijanê Qomişlo dêsê îşxalkarî yê Efrînî şermezar kerd

Bi hezaran merdimê Qomişloyijî, vera dêsê îşxalkarî yo ke Efrîn de ameyo viraştene rayraşîyayîşêk viraşt. Çalakîye de ame vatene, “Ma do Efrînî azad bikerê.”

Bi hezaran kesî wareyê Şehîdanê Enternasyonalîstan o ke taxa Enterîye ya Qamişloyî de ameyî têhet û vera dêsê îşxalkarî yo ke Efrîn de ameyo viraştene rayraşîyayîşêk viraşt.

Bi hezaran merdimê Kurd, Ereb, Suryan û Armenî bi gilê zeytûne yo ke sembolê Xoverdayîşê Serdemî yo, rayra şîyî. Hêzê Asayîşê Zereyî, tîmê Hawarî û trafîkî seba asayîşê rayraşîyayîşî tedbîr girewt.

Rayîraşîyayîş de pankartê bi nuşteyê “Ma do xoverdayîş gird bikerê, dêsan birijnê, Efrînî bixelisnê”, “Erdogano kiştox”, “Kanê merdimîye?”, “Biciwîyo xoverdayîşê Efrînî” bi ziwanê Kurdkî, Îngîlîzkî û Erebkî ameyî akerdene.

Rayraşîyayoxan bi slogananê paştdayîşê Efrînî û slogana “Bi rijnayîşê dêsan ma do Efrînî bixelisnê” heta goristanê Şehîd Delîl Saroxanî rayraşîyayîş kerd.

Rayrayîş bedilîya mîtîngî û peyamî ameyî dayene.

Endama Rayberîya Kongreya Starî ya bajarê Qamişlo Menîce Heydere awankerdişê dêsê parçakerdişê Efrînî şermezar kerd û vat, “Bi awankerdiş dêsê îşxalkerîye wazenê ke Efrînî bikerê erdê Tirkîya. Vera nê qeraranê îşxalkeran rejîmê Sûrîye û dewlete mîyanneteweyî bêveng ê.  Heta Efrîn do azad bibo ma têkoşînê xo bidomnê.”

Hemserekê Meclîsê Qezaya Rojakewtena Qamişlo Ebdullkerîm Ebdullrehmane bêvengîya dewletanê mîyanneteweyî ya vera qeraranê dewleta Tirkî ya îşxalkare şermezar kerde û vat, “Efrîn, beşêkê erdê Sûrîye yo. Ganî rejîmê Sûrîye wezîfeyê xo bîyaro ca. Bêvengîya rejîmê Sûrîye eşkera keno ke Tirkîya û Rûsya pêameyîş kerdo. Ma do bi xoverdayîşê xo Tirkîya Efrînî ra bivejê.”

Mîtîng bi tilîlîyanê dayîkan û bi slogana "Efrîn teyna nîyo” qedîya.