Hemsereka PYDyî Ayşe Hiso ANFyî rê hêrişê vera Kobanê û Rojawanî, armancê nê hêrişan, hêrişê PDKyî û qewimîyayîşê 2021î yê Rojawanî ercnayî.

Ayşe Hiso bale ante ser ke wextê peyênî de hêrişê vera Kobanê zêdîyayî û vat: ''DAÎŞ projeyo tewr pîl ê dewleta tirke bi. Kobanê zî sembolê Şorişê Rojawanî bi. Pê xoverdayîşê Kobanê prosesê binkewtişê DAÎŞî dest pêkerd. Dewleta tirke qetî no binkewtiş qebul nêkerd. Coka tim Kobanê ra hêrs bena, her firsend de hêrişê Kobanê kena. Bi nê hêrişan Tirkîya armanc kena ke aramî û îstîkrarê herême bixerîpna. Şarê Kobanê naye hol zaneno.''

Ayşe Hiso da zanayene ke PDK Rojawanî ra heta Mexmûr xeylêk waran de ambargo ano ca û vat: ''Tay kesî vanê ke semedê çalakîyanê ciwanan ra Berê Sêmalka ame qefilnayene. La a çalakîye seba girewtişê cenazayan bîye. Şarê ma seba ke cenazayanê xo bigêro çalakîye keno. Oyo ke hêrişê ciwanan kerd û ciwanî provake kerdî PDK yo. PDKyî dima zî no sey bahane mojna û berê sînorî qefilna. Birê Astana yê ke xizmetê dewleta tirke kenê pê destê PDKyî yenê caardene.''

Ayşe Hiso pare kerd ke serra 2021î seba Rojawanî pê xoverdayîşî vîyarte û vat: ''2021 de Îdareyê Xoserî xo hîna aver berd û kerd ke bibo mende. Nika ra aseno ke serra 2022î do bina serrêka girîngêr û xorine. Nika ra aseno ke ma do hêrişanê îşxalî û polîtîkayanê şerî de têrî bibê. La vera nînan têkoşîn û xoverdayîşêko bêhempa do bêro caardene. 2022 de ma do pêro meseleyan çareser bikerê û sîstemê xo warê mîyanneteweyî de bidê şinasnayene. Ma do nê esasî ser o xebatanê pîlan û têkoşînî bikerê.''