Heyva Sore ya Kurdîstanî (HSK) vera vîrusê Korona menga vîyarte de seba Rojawanê Kurdîstanî kampanyaya '100 hacetê helmgirewtişî' dabi destpêkerdene. Çarçewa kampanya de 15 hacetî erşawîyayî herême.

HDKyî derheqê kampanya de eşkerayîye daye û vist vîrî ke heta nika Rojawan de 7651 kesî pê Korona kewtî û 251 kesî zî Korona ra merdî. HSKyî ard ziwan ke Rojawan de hacetê helmgirewtişî hewcedarîyê lezabezî yê û bi hetkarîya HSKyê Îtalya 15 hacetî erşawîyayî Rojawanê Kurdîstanî. HSKyî venga pêro merdiman da ke vera vîrusê Korona wa paştî bidê şarê Rojawanî.

Berpirsîyarê Ofîsê Têkilîyanê Teberî yê Heyetê Weşîye yê Rojawanî Silêman Ahmedî derheqê kampanya de agahîyî dayî.

Silêman Ahmedî vat: ''Ma Heyva Sore rê sipas kenê. Nika ma mîyanê şert û mercanê giranan de yê. Hema zî Rojawan de tehlukeyê vîrusê Korona dewam keno. Coka hewceyê ma pê hacetanê weşîye esto. Ma pê hêvîdar ê ke paştdayîşê seba Rojawanî do dewam bikero. Çunke nika Rojawan binê ablûqa de yo. Nê hacetî xora muhîm ê la qîm nêkenê. Coka ma her kesî rê sipas kenê ke nê rojanê zehmetan de ma reyde yê.''

Endamê Îdareyê Heyva Sore ya Kurdîstanî Dilgeş Îsayî zî bale ante girîngîya nê hacetan ser û vat: ''Nê hacetî nêweşxaneyan rê bêrê vilakerdene. La hema zî hewceyê ma pê nê hacetan esto. Ma venga şarê xo yê teberî danê ke wa paştî bido ma.''