Hêzanê Pawitişî yê Komelkî (HPC) yê ke Rojawan de warê leşkerî û komelkî de xo rêxistine kerde û xopawitişî esas genê tewr peynî de hêrişê vera Hesekê de ramojna ke rolê înan senî muhîm o. HPC şarî ra yeno rameyene û têna cephe de şer nêkeno, eynî wextî vera  şerê taybetî hetanê bînan ra zî şarî paweno.

Endamê Îdareyê HPCyî ra Muhammed Cemil Îbrahîmî  ke ANFyî rê qisey kerd vat: ''Xopawitiş sey nan û awe hewce keno. Xopawitiş têna semedê merdiman nê semedê heme ganîyanê rîyê erdî hewce keno.  Sîstemê xopawitişî yê merdim, nebat û heywanan estê.  Rewşa peyêna ke qewimîye ramojna ke xopawitiş senî muhîm o.

HPC hetê komelkî û leşkerî ra xo rêxistene keno. Goreyê sîstemê ma heme merdimê ke herême de ganî di nasnameyê înan bibê. Teberê nasnameyê dezgehê ke tede xebityeno ganî nasnameyê ci yê xopawitişî zî bibo. Eke ma muhîmîya rolê xopawitişî ser o mevinderê, ma nêeşkenê vera hêrişan xo bipawê. Ma şarê xo reyde kombîyayîşan kenê ke wa rolê xopawitişî rind fam bikero.  Yew şar senî hêzdar beno wa bibo, eke wayîrê herre, kultur û ehleqê xo mevejîyo, tewrê şerî mebo nêeşkeno ser bikewo. Coka ganî şarê ma eynî wextî de endamê HPCyî bo.

Ma wayîrê na herre û nê welatî yê, ganî ma berpirsîyarîya xo bîyarê ca ke qederê xo teslîmê dişmenî mekerê. Eke şar bêrêxistene û bêperwerdeyî bimano verê îşxalî nîno girewtene. Her hemwelatî ganî xopawitişî bîgêro xo ser. Ganî ma wayîrê projeyê Rayber Apoyî û keda şehîdan vejîyê ke bibê azad. Wextê hêrişê vera Hesekê ke seferberîye ameye îlankerdene. Her kesî taxe û kuçeyê xo pawitêne. Xora cinîyan rewna xo îspat kerd. Zafê endamanê HPCyî cinî yê.  Ma pêro yew keştî de yê. Ganî heme dînî û neteweyî xo bipawê, wayîrê xopawitişî vejîyê. Wa prosesê Efrîn, Girê Sipî û Serêkanîyê merê vîrakerdene.''