Merkezê Îrtîbatî û Çapemenîye yê HPGyî bîlançoya şerî ya menga çeleyî eşkera kerde. Eşkerayîye de nê ameyî parekerdene:

''Dewleta tirke ya qirkere û hukmato faşîst ê AKPyî menga çeleyî ya 2025î de zî Vakurê Kurdîstanî û Herêmanê Pawitişî yê Medya de hêrişanê xo rê dewam kerd. Vakurê Kurdîstanî de Dêrsimî ra heta Serhedî, Garzanî ra heta Amedî, Mêrdîna heta Botanî, Colemêrg û Wanî bi seyan operasyonê leşkerî ameyî kerdene. La nê heme operasyonî ameyî betalkerdene. Herêmanê Pawitişî yê Medya de pîya bi operasyonanê îşxalî, vera şarê ma yê Başûrê Kurdîstanî hêrişî ameyî kerdene hemwelatîyê ma yê sîvîlî ameyî qetilkerdene. Rejîmo faşîst ê AKPyî ke sîyasetê şer û qirkerdişî de israr keno, verê çimanê dinya de bi qetilkerdişê sîvîlan û şuxulnayîşê çekanê qedexeyan sûcê şerî keno.

Dewleta tirke ya îşxalkere menga çeleyî de 5 reyî pê çekanê kîmîyewîna, 9 reyî pê droneyanê teqaber barkerdeyan û 113 reyî pê  teqaberanê qedexeyan hêrişê tunelanê şerî yê Herêmanê Pawitişî yê Medya kerd. Eynî wextî de warê xoverdayîşî zî 235 reyî pê teyareyanê şerî û 59 reyî pê helîkopteranê hêrişî dîyayî bombayan ver.

Gerîlayanê Azadîye yê Kurdîstanî vera nê hêrişanê Vakurê Kurdîstanî û Herêmanê Pawitişî yê Medya de bêmabên têkoşînê xo domna. Hêzanê ma ke vera nê hêrişan bi cesaretê girdî û performansî xover da, şertanê zimistanî de bi taktîkanê cîya cîyayan 13ê înan hewayî ra, 50ê înan erdî ra 63 çalakîyî kerdî. Nê çalakîyan de 6 îşxalkerî ameyî cezakerdene, îşxalkerêk birîndar bi. Reyna xeylê wesayîtê zirxinî, maleze û çeke zî ameyî îmhakerdene û derbkerdene.

Gerîlayê Azadîye yê Kurdîstanî semedê pawitişê şarê kurdî û azadîya ci senî ke heta ewro bi ruhê fedayîyî xover da û cewabê hêrişan da, ewro ra tepîya zî do cewabo ke hewce keno bidê.''