Dima ke dewleta tirke ya îşxalkare cerganê xo reyde dest pê hêrişê vera Rojawanî kerd tewr tay 350 hezar sivîlî neçare mendî ke warê xo terk bikerê. Sivîlê ke neçarî ra Serêkanîyê Girê Spî û Til Temirî ra koç kerd, dibistananê şaristanan ê dormeyî de ca da xo. Îdareyê Xoserî seba şarê koçberî Reqa (Girê Sipî) de û Hesekê (Waşokanî) de kampî awan nayî ro.

Kampa Waşokanî bi 12 kîlometreyan Hesekê ra dûrî ya. Nufusê merdiman kampe de roje bi roje zêdîyena. Îdarekaranê kampe ra Stêra Reşik derheqê rewşa peyêne de qisey kerd. Reşikî pare kerd ke nufusê kampe zaf lez zêdîyeno û îfade kerd ke seba ke hewcedarîyê sivîlan bêrê peydakerdene ganî her kes destê ci ra çi bêro bikero.

Stêra Reşikî derheqê hûmara merdimanê kampe de vat: '' Kampe de 1518 xeyman de 9706 kesî manenê. Kampe de 39 dezgehî kar kenê ke Asayîş, HPC, Heyva Sor a Kurdistanî zî tede yê. Hûmare roje bi roje zêdîyena. Êyê ke wazenê şorê kampa Newroze ma hetkarîya înan zî kenê. Kampa Waşokanî de tay meseleyî estê ma xîret kenê ke înan çareser bikerê. Îdareyê Xoserî ra berî dezgehêk hetkarîya kampe nêkeno. Ma venga dezgehanê sivîlan danê ke cewab bidê hewcedarîyanê koçberan. ''