Îşxalê dewleta tirke û cerganê aye yê vera Serêkanîyê û Girê Sipî de bi se hezaran kesî neçare mendbî ke warê xo ra koç bikerê û bi hezaran wendekarî zî perwerde ra ameyî dûrvistene. Îdareyo Xoser ê Rojawanî seba wendekaranê koçberan xebatanê xo dewam keno.

Dêrik de seba ke wendekarê perwerdeyê xo dewam bikerê Kampa Newroze de dibistanêke ameye akerdene. Kampe de 60 keyeyê serêkanîyêyîjî û 100 wendekarî estê. Dibistana kampe de dersî bi erebkî û kurdkî yenê dayene. Pêro hewcedarîyê kampe hetê Îdareyê Xoserî ra yenê peydakerdene û dersî goreyê mufredatî yenê dayene. Mamostayanê dibistane ra Barîne Osman îfade kerd ke keyeyî û wendekarî pê dibistane kêfweş ê. Barîne ard ziwan ke akerdişê dibistane do tesîrê moralê wendekaran zî bikero. Wendekara bi nameyê Sîneme Sîdo zî da zanayene ke a zaf şayî ya ke dibistanêka înan esta.