Hemserekîya Konseya Rayberdişî ya KCKyî bi wesîleya Roşanê Newroze eşkerayîya nuştekîye daye. KCKyî Newroza pêro şaranê Mezopotamya û şaranê bindestan ê dinya pîroz kerd û veng da ke wa her kes Newroza 2025î waran de pîroz bikero.

Eşkerayîya KCKyî de nê ameyî vatene: 

''Ma zî sey şarê xo bi heyecanê girdî yê Newroze ciwîyene. Newroza ke tarîx de xoverdayîşê vera Dehaqî û newerabîyayîşê îfade kena hezar serrî yo ke semedê şaranê Mezopotamyaya qedîme sey sembolê xoverdayîşî û newerabîyayîşî yene pîrozkerdene. Hezar serrî yo ke şarî vera zulm û zextî bi ruhê Newroze xover danê, bi Newroze cuye newera yena afirnayene, yena ridkerdene û azad bena. Newroze roja ma de zî bi eynî mana bi coşî yena pîrozkerdene.  Ma Newroza her kesî ke germayîya adirî zerrîya xo de hîs keno û xover dano, pîroz kenê! Newroza 2025î wa pîroz bo!

Şarê kurdî sey afirnayoxê ci Newroze tewr xorî ra ciwîyeno. Tarîxî ra kurdî vera zaliman bi Newroze xover danê û xo newe ra afirnenê. Rayber Apo rîyê na raştîya tarîxî ra vat 'Şarê kurdî şarê Newroze yo.' Bi nê zanayîşê tarîxî Newroza şarê xoverdayoxî yê Kurdîstanî wa pîroz bo. Înanê ke bi fedakerdişê ganê xo na roje ma rê dîyare kerd gerek  ma înan bi hurmet, heskerdiş, hesret û şukranî yad bikerê û înan bidê ciwîyayene. Bi nê hîsan ma şexsê Kawayê Hemdemî Mazlûm Doganî û Zekîye, Rahşane, Ronahî û Berîvanî ê ke rêçe ey de şîyî,  heme şehîdanê demokrasîyî bi hurmet, heskerdiş, hesret û şukran yad kenê.

Vengdayîşê Haştîye û Komelê Demokratîkî yê Rayber Apoyî manayo newe da Newroza 2025î. Şarê ma bi moralê ke nê vengdayîşî ra girewt Newroza 2025î bi waştişê caardişê azadîya fîzîkîye ya Rayber Apoyî û afirnayîşê Komelê Demokratîkî verwazî keno. No tewirê şarê ma zaf bimana yo. Wayîrvejîyayîşê nê vengdayîşê tarîxî yê Rayber Apoyî  û têkoşînê semedê caardişê ci zaf muhîm o.

Pêvînayîşê bi Rayber Apoyî de rolê Hemlaya Azadîye gird o. Ma hêvî kenê ke dostê ma yê enternasyonalî  xebatanê xo rê dewam kenê. Ma veng danê şarê xo û dostan ke wa Newroze de vejîyê waran û wayîrê vengdayîşê Rayber Apoyî bivejê. Semedê caardişê Vengdayîşê Haştîye û Komelê Demokratîkî gerek azadîya fîzîkîye ya Rayber Apoyî bero caardene. Ma reyna bi germayîya adirê Newroze, Newroza her kesî pîroz kenê û hêvî kenê ke Newroz her kesî rê haştîye, demokrasî û azadîye bîyaro.

Newroz Pîroz Be!

Bijî Newroz!''