Dewleta tirke ya îşxalkere Rojawan de bi hawayêkê sîstematîkî hêrişê şehîdgehan kena. Tewr peyên dewleta tirke ya îşxalkere Efrîn de şehîdgehê nêzdîyê Nêweşxaneyê Avrînî xera kerd. Şehîdgeh de cenazayê şerwananê YPG, YPJ û QSDyî estbî. Dewleta tirke cenazayî şehîdgehî ra vetî la nêzanîyeno ke cenazayî ameyî berdene bi kamca. Ajansê fermî yê Tirkîya Anadolu Ajansi (AA) cenazayî sey 'gorê komkî' mojnabî.

Endamê Rêxistina Heqanê Merdiman a Efrînî Cibrayîl Mistefayî derheqê mesele de qisey kerd û vat: ''Ma dî ke Ajansê Anadolu vano 'Efrîn de gorê komkî dîyayî û nê kesî destê YPG-YPJyî ra kişîyayî.' Nê cenazayî pê kefenan, tek tek ameyê definkerdene. Gorê komkî la wina benê? Mi ê goristanî de 3 merdimî defin kerdî. Eke dewleta tirke îdîa kena raşta zî ê gorê komkî yê wa cenazayan bidê merdiman. Eke dewleta tirke dosyaya cînayetî amade kena ganî na dosya de cewabê tay persan estbê. Ê şehîdgehî de cenazayê domananê ke bombardumanê dewleta tirke de kişîyayî estbîyî. Ma komîteyêka mîyanneteweyî ra wazenê ke wa şorê nê cenazayan ser o cigêrayîş bikerê. Wa dewleta tirke zî îdîaya xo ya cînayetî îsbat bikera. Tirkîya her hetî ra îflas kerda. Hînî destê ci de çîyêk nêmendo coka hêrişê şehîdgehan kena. 

Xeylêk raporan de sûcê dewleta tirke yê vera Efrînî ameyî eşkerakerdene ke nînan ra yew zî raporê Komîteya Cigêrayîşê Mîyanneteweyî ya Sûrîye yo. Dewleta tirke zanayêne uca de gorê şehîdan estê la qestî ra şarî xapînena. Dewletê mîyanneteweyî vera cînayetanê Tirkîya bêveng ê. La ma amade yê ke pêro delîl, şahîd û dokumentanê xo pêşkêşê înan bikerê. Goreyê Peymana Laheyî dewleta tirke gereka sivîlî bipawitêne û vera goran hêriş nêkerdêne. Dewleta tirke peymananê mîyanneteweyîyan binpay kena.''

Kênaya şehîd Mihemed Mistefayî Ayîde Mistefa ard ziwan ke cenazaya babîyê ci gorî ra ameya vetene û vat: ''Babîyê mi Hêzê Asayîşê Zereyî de wezîfedar bi û bombardumanê dewleta tirke de şehîd bi. Ma 14ê adara 2018î de babîyê mi û 35 şehîdê bînî pê merasîmêkî ê şehîdgehî de defin kerdî. Ez venga rayaumûmîya mîyanneteweyî dana ke cenazayanê ma wa bidê ma. Ma nêzanenê dewleta tirke ma ra, şehîdanê ma ra çita wazena. Ma wazenê rojêke abigêrê Efrîn. ''

Babîyê şehîd Ehmed Xanêyî Ebdîn Xanêyî zî vat ke lajê ci Ehmed 12ê adara 2018î de şehîd bi û binê bombardumanî de înan lajê xo defin kerd. Xanêyî venga pêro dezgehan da ke wa bimusê ke dewleta tirke cenazayê înan se kerdê.