Dewleta tirke çend rojî verî cenazayê şehîdgehê nêzdîyê Nêweşxaneyê Avrînî xera kerdbi û vatbi 'uca gorê komkî yê sivîlanê ke hetê YPG û YPJyî ra kişîyayê.' Keyeyanê şehîdan vera zûrê 'gorê komkî' yê dewleta tirke nêrazîbîyayîşê xo mojna. Keyeyan Medya Haber rê qisey kerd û qala ci kerd ke şerwan û şehîdê sivîlî senî ameyî definkerdene.

Avdoyê Tevfîko ke babîyê ci Tevfîk hetê dewleta tirke ra ame qetilkerdene û cenazaya ci zî gorî ra ameya vetene da zanayene ke înan babîyê xo nêzdîyê şehîdgehî de defin kerd û vat: ''Babîyê mi 13ê sibate de hêrişê Alemdarî de birîndarbi, 14ê adare de Nêweşxaneyê Avrînî de şehîd bi. Dormeyê Efrînî amebi girewtene, Efrîn de 3 şehîdgehî estbîyî. Ma cade şehîdgehê nêzdîyê nêweşxaneyî de defin kerd. Babîyê mi reyde ma 32 cenazayî heman roje defin kerdî. Babîyê mi hetê dewleta tirke û cerganê ci ra ameyî şehîdkerdene.''

Amara hêrişanê dewleta tirke yê vera Efrînî de şehîd bîya. Dadîya ci vat: ''Êyê ke qirkerdişê Mahmûdî û qirkerdişanê bînan de ameyî qetilkerdene, pêro arê dîyayî. Mîyanê înan de sivîlî zî estbîyî. Şaristan de goristan çinbi ke ma şehîdanê xo defiin bikerê. Ma zî neçare mendî ke nêzdîyê Nêweşxanetê Avrînî de defin bikerê. Ê merdimî seba pawitişê erdê xo şehîd bîyî.

Pêro dinya zulmê dewleta tirke yê vera kurdan seyr kerd. Erdogan û cerganê  ci cinî, kokim, domanî, her kes qetil kerdî. Nika zî hêrişê cenazayanê ma kenê. Ganî dewletê dinya hesabê ney bipersê. Mabênê Erdogan û DAÎŞî de yew ferq çin o. Cergê raştikênî Erdogan bi xo yo. Erdogan cergan şaweno Efrîn, o vano wa pêro kurdî bikişîyê. La ma do çin nêbê û heta ke weş bê vera zulmê Erdoganî wurzê payan ser.''