Keyeyê şehîdan ê Qamişloyî dayî zanayene ê çalakwananê ke hemverê tecrîdî de xover danê dir ê.

Endamanê Sazîya Keyeyê Şehîdan a Herêma Rojawanî ya Qamişloyî ra Fehîme Xelîle maya şehîdêk a. Xelîle vat Rayberê Şarê Kurdî Abdullah Ocalan bi hawayêkê nêheqî û teberê qanûnan de yeno tecrîdkerdene û vat, “Bi nameyê keyeyanê şehîdan ma nê xoverdayîşî dir ê. Ma xusûsen zî hêrişanê hêzanê dewleta Tirkî yê hemverê mayan şermezar kenê. No hal bin ê hawayî nêşino.”

Abdulezîz Abdurrahmanê PYD’yijî zî da zanayene ke grevê vêşanîye hemverê zulmkarîya dişmenî de çalakîyêka bitesîr a û ard vîrî ke na rastî tarîxê Kurdan de amîya dîyene. Abdurrahmanî ard vîrî ke wextê Eyyûbîyan de Mihyeddîn El Arabî seba ke hemverê sîstemî de vejîya ame tepiştene û zîndan de kewt grevê vêşanîye û dewam de nê vatî: “Bi hezaran Kurdî nika teber de û zîndanan de hemverê zulmî de xover danê. Her cayê dinya ra paştî dîyena nê xoverdayîşî. Dostê têgêrayîşê ma zî çalakîyanê wayîrvejîyayîşî virazenê. Grevê vêşanîye sîlehê hemverê serdestan o. Dişmen bi xo nêzano ke cewabêko senîn bido. Eke merdimêk bedene xo helneno, tu hêz nêeşkeno hemverê ci de vindero. Embazê ma bi aqilê xo, bi îradeyê xo hemverê nê zulmî de vindenê. Ma do bi ser bikewê û dişmenî bin fînê.”

‘Ma do Bibê Yew’

Vehbîye Sofî ya ke keyeyê aye de xeylî şehîd û şorişgêrî estê, Rayberê Şarê Kurdî Abdullah Ocalan û çalakwanî silam kerdî û paştî da xoverdayîşî. Sofîye vat, “Ê her vîste de heşê ma de yê û ma do înan çi rey xovîr ra mekerê.” Sofîye vat ke ê do pîya, bi yewîye her çar perçeyan azad bikerê.