Koordînasyonê Komalên Jinên Kurdistan (KJK) derheqê xespkerdişê şaredarîyanê Mêrdîn, Êlih û Xelfetî eşkerayîya nuştekîye daye û nê vatî:

''Şarê ma yo erjîyaye, cinîyî, ciwan, merdimê ma û dostê ma yê ke hetê demokrasî û azadîye de yê, şima reyna bi hêrişanê îqtîdarê faşîstî yê dişmenê kurdan û cinîyan hîşyar bîyî. Heta ke faşzîm bin mekewo ma nêeşkenê rojanê roşnan rê hîşyar bibê. Heqîqato raşt o yo ke semedê nê îqtîdarî ra xelisnayîşî têkoşîn ganî bi asta serhildanî de bêro xurtkerdene û vera xespkerdişê îradeyî xoverdayîş bêro kerdene.  Ma reyna vanê ke îqtîdaro faşîst do vera xoverdayîşê şarî bin bikewo.

Şaredarîya Mêrdîn, Êlih û Xelfetî yê ke bi rayanê rekoran ameyî destfînayene hetê îqtîdarê faşîstî yê dişmenê kurdan û cinîyan ra ameyî destsernayene û tede qeyûm ame cakerdene. Şaredarîya Esenyurtî ya Îstanbulî  1ê teşrîna peyêne de ameye destsernayene. Sebebê ci zî o bi ke Ahmet Ozer kurd o.Îqtîdaro ke versîyonê Hîtlerî yê Tirkîya yo tersê vînîkerdişî ra reyna hêrişê îradeyê cinîyan û kurdan kerd. Vera na dişmenîye teberê xoverdayîşî de yewna rayîr çîn o.Hemşaredara Êlihî ya ke pêroye Tirkîya de rayê tewr zaf girewtî seba ke cinîya no zî zorê îqtîdarî şi. Ma pê xoverdayîşî eşkenê nê hêrişan bin bifînê. Îqtîdaro faşîst do bin bikewo û cinî û şarî ser bikewê.

Cinîyê erjîyayeyî û şarê ma!

Yew menge ya îqtîdarî bi xo kayêk kay kerd. Nika fam kerd ke cinî û şarî hinî kayanê ci rê nêxapîyenê, bi tersê vînîkerdişî hêrişê xo girdêr kerdî. Îqtîdaro faşîsto ke 22 serrî yo Tirkîya Kurdîstan de şaran rê gonî dano vîrêjnayene, tewr hole Rayber Apo, kurdî û cinîyî şinasnenê. Ma zanê ke her gama ke îqtîdar erzeno semedê dahîna cadayişê xo keno. Muneqeşeyê qanûnê bingeyî yê neweyî, selamdayîş û vengdayîşê seba Rayber Abdullah Ocalanî yê Bahçeliyî pêro zereyê nê konseptî de yê. Eşkera yo ke wazenê hêrişanê xo yê îmhayî zemînê neweyî ser o bikerî. îqtîdaro faşîst tim têna menfeatê xo dima yo. Nika zî konseptê şerî yo newe fîna dewre. Newera cezaya dîsîplînî ya qedexeyê pêvînayîşî dîyaye Rayber Abdullah Ocalanî. No zî eşkera rengê nê fotografî fîneno meydan. Ma reyna fam kerd ke ganî nê îqtîdarî çîyêk nêro pawitene, têna vera ci xoverdayîş bêro kerdene.

Hetêkî ra hêrişê qirkerdişî yenê xurtkerdene, sey parelelî bi polîtîkayanê ke zemanî ra vila kenê, kenê ke hîşê şarî bikerî têmîyan. Cehd kenê ke xeta şorişgêre ya kurdan cîya bikerî, cêser bifînê. Polîtîkaya winayêne vera muxalîfanê bînan zî yena rayraberdene. Coka ganî vera îqtîdarê AKP-MHPyî Tirkîya û Kurdîstan de têkoşîn bêro xurtkerdene. Seba ke ma sey cinîyan nê îqîtdarê dişmenê cinîyan ra bixelisîyê ganî ma kuçeyan biaçarnê warê xoverdayîşî.

Tay mend do şirê. Heta ke no îqtîdar nêşiro  qirkerdişê cinîyan û domanan, krîzê ekonomî û helisyayîşê komelkî nêqedîyenê. Ganî şar nê îqtîdarî ra bêro xelisnayene. Têna bi çaserkerdişê meseleya kurdan problemê Tirkîya eşkenê bêrê çareserkerdene. Ganî ma sey cinîyan û şaran vera nê hêrişan hêzê xo bikerê yew û xoverdayîşî xurtêr bikerê. Têna bi xoverdayîşî ma eşkenê ser bikewê.''