'Rayraşîyayîşê Rûmetî' yê Kobanê de bi hezaran kesî vera hêrişanê îşxalî yê dewleta tirke û PDKyî vejîyayî meydan. Hemserekê Meclîsê Rayberdişî yê Xoserî yê Herêma Firatî seba wayîrvejîyayîşê gerîlayan veng da.
Bi hezaran kesî herêma Firatî ya Warê Jina Azad a Kobanê de kom bîyî û înan pê sloganê 'Vera îşxalî û xîyanetî Rayraşîyayîşê Rûmetî' dest pê rayraşîyayîşî kerd. Wina pawîyeno ke rayraşîyayîş nêzdîyê Dergehê Mrşîdpinarî yê sînorê Vakurî ra derbaz bibo.
Rayraşîyayîş de hêrişê îşxalî yê dewleta tirke yê vera Başûrî Kurdîstanî, hemkarîya PDKyî ya bi Tirkîya yenê şermezarkerdene.
10ê hezîrane de zî Qamişlo de Rayraşîyayîşê Rûmetî amebi kerdene.
Rayraşîyayîş Warê Aştîyê de vurîya nawnayîş. Hemserekê Meclîsê Rayberdişî yê Xoserî yê Herêma Firatî Mihemed Şahînî nawnayîş de qisey kerd û seba wayîrvejîyayîşê gerîlayan veng da.
Hemserekê Meclîsê Kantonê Girê Sipî Hemîd El-Ebidî zî pare kerd ke dewleta tirke seba ke qesasê DAÎŞî bigêra hêrişê Efrîn, Cerablus, Serêkanîyê û Girê Sipî kerd. Hemîdî da zanayene ke ê hêzanê QSDyî û gerîlayan reyde yê û vat: ''Ganî ma bêveng nêmanê û vera fîtne û provakasyonan şîyar bibê. Ma xoverdayîşê gerîlayan selam kenê. ''
