Hêrişê dewleta tirke û cerganê ci yê vera Rojawanî dewam kenê. Bi taybetî hêrişê vera Eyn Îsa û deanê Girê Sipî, rayîrê M4î zêdîyayî. 

Fermandaranê Eyn Îsayî ra Erdal Kobanêyî hêrişê dewleta tirke ercnayî. Erdal Kobanêyî îfade kerd ke dewleta tirke goreyê pêkerdişî tênêgêrena, her roje hêrişanê xo zêdînena û eke wina dewam bikero ê do heqê xo yê pawitişê meşrûyî bixebitna. Kobanêyî vat: ''Dewleta tirke 5-6 baregehê neweyî yê leşkerîyî viraştî. Xîret kena ke hêrişê xo yê hewayî û erdî bizêdîna. Dewleta tirke tewr zaf hêrişê M4î, Ebû Sira, Eyn Îsa kena û dewanê Hoşan, Dibis û Xalîdiyê ser o zî bombayan varnena. Dewleta tirke na menga peyêne e zî xîret kena ke erdê ma îşxal bikera.''

Kobanêyî vist vîrî ke QSD goreyê pêkerdişî têgêreno labelê dewleta tirke pêkerdiş binpay kena. Kobanêyî vat: ''Rûsya û rejîm seba ke verê hêrişanê Tirkîya bigêrê tîya de yê. La ma vînenê ke vera hêrişan bêveng ê. Wexto ke leşkerê rejîmî hêrişê Tirkîya de birîndar benê rejîm Tirkîya rê cewab nêdano. Tirkîya zî nê hêrişan ra cergan mesuldar vînena. Labeşê Rûsya zî zaneno ke Tirkîya nê hêrişan kena. Nika peymanêke esta û ma goreyê na peymane têgêrenê. Labelê eke vera ma hêriş bêro kerdene ma do heta peynî erd û şarê xo bipawê.''