Bajarê Hesekê yê Rojawanî de hetê Merkezê Cigêrayîşanê Stratejîkan ê Rojawanî (NRLS) ra Komxebata Lozanî ame kerdene. Komxebate vizêr roja diyîne de qedîyaye. Peynînameyê komxebate kurdkî û erebkî ame wendene.

Peynîname de nê peşnîyaz û waştişî ameyî rêzkerdene:

“* Rixmo ke Pêkerdişê Lozanî seserrî xo dima verdayî,hema zî haştîya herême û îstîkrar nêameyî ca. Dewletê berpirsîyarê nê pêkerdişî gerek problemê ke pêkerdişî ra vejîyayî çareser bikerê. Wa paştî medê dewletanê ke nê pêkerdişî goreyê menfeatê xo şuxulnenê, wa zilmê vera kurdan biqedînê.

*Goreyê pêkerdişanê heqanê merdiman û pêkerdişê Neteweyanê Yewbîyayeyan dewletê ke tesîrê mîyanneteweyî kenê gerek dewaya kurdan qebul bikerê û heqê qederê xo tayînkerdişî yê kurdan qebul bikerê.

* Seba ke şarê kurdî qirkerdişî ra bêro xelisnayene gerek hêzê kurdan qabîlîyetê xo yê sîyasî, ekonomîk û leşkerî xurtêr biker û koordîne bikerê. Na çarçewe de hêzê kurdan gerek fikranê xo yê cîyayan caverdê, pêkerdişêkê neteweyî îmza bikerê. Heme hetê mecbûrê ke goreyê pêkerdişî têbigêrê.

* Şarê kurdî şaranê bînan tehdît nêkeno. Dewletanê ke herra Kurdîstanî cîya kerd, gerek polîtîkayanê xo yê vera kurdan û heqê cuye yê kurdan newe ra bîgêrê dest û heqanê kurdan qebul bikerê.

* Projeyê netewa demokratîke Rojawan de yeno ciwîyayenê. Gerek Îdareyo Xoser warê mîyanneteweyî de bêro naskerdene.

* Hêrişê ke Kurdîstanî de yenê domnayene dewamê Pêkerdişê Lozanî yê. Gerek hêzê mîyanneteweyî şirê dewletanê sûcdaran ser ke  wa goreyê qanûn û pêkerdişan têbigêrê.

* Ma veng danê komelê mîyanneteweyî ke wa vera polîtîkaya îmha, înkar û qirkerdişî ya ke vera şarî yena caardene, berpirsîyarîya xo bîyarî ca.”