Xeylê sîyasetmedar, roşnvîr û hunermendî tewrê konferansî bîyî. 

Dozgerê verênî yê Mehkemeya Heqanê Merdiman a Ewropa Riza Turmenî destpêk de qisey kerd û bale ante ser ke ganî komel tewrê prosesê çareserîye bibo. Turmenî vat: ‘’Seba ke prosesê haştîye ser bikewo ganî şar tewrê ci bibo û dewlete polîtîkayanê asayîşperestan ra fek vera bida. Meseleya kurdan meseleya pêro komelî yo; coka seba çareserîya ci îradeyê cuya hempare lazim o. Naye ra ganî ma ziwanê çareserîye yê hemparî peyda bikerê.’’

Hemserekanê DEM Partî Tulaye Hatîmogullari û Tuncer Bakirhanî zî mesajêk şawit kongeransî. Înan mesajê xo de vist vîrî ke Rojhelatê Mîyanênî krîzî bi şerê Îran Îsraîlî xorinêr benê û vat: ‘’No şer ganî bêro vindertene. Dewrê winayênî de girîng o ke mîyanê Tirkîya de haştîye bêra caardene. Ganî meseleya kurdan bêra çareserkerdene. Awankerdişê haştîye bê caardişê edaletî nêbeno. 

Haştîye awankerdişê cuyêka têdûşte, azad û demokratîke yo. Ma hêvî kenê ke no konferans do bibo wesîle ke tede demokrasî, sîyaseto azad û huqûq xurtêr bibê. Bi nê hîsam ma şima selam kenê.’’