23ê adara 2019î de şerwananê YPG û YPJyî estbîyayîşê DAÎŞî erdî ser o qedîna. Roja azadkerdişê Baxozî peynîya DAÎŞî bîye. Hemserekanê Meclîsê Sivîlî yê Şehîd Selîm El Abd Alla yê Baxozî Madlîne Abdûrrahman û Salîm Mûhammed Xelefî bi wesîleya serrgêra 2. ya xelisnayîşê Baxozî ANFyî rê qisey kerd.

Salim Muhammed Xelefî vat: ''Ma destê DAÎŞî ra zaf zulm dî. Roniştoxê Baxozî neçare mendî ke herême biteriknê. Dima ke şerwananê QSDyî 23ê adara 2019î de şaristan azad kerd roniştoxê herême agêrayî erdê xo ser. Nika herême de 45 hezar kesî manenê. Ma 1ê çeleyê 2020î de Meclîsê xo awan kerd. Nika 18 komunê ma estê. Ma kenê ke meseleyanê şarî çareser bikerê. Şar zî pê Îdareyê Xoserî û sîstemê hemserekîye kêfweş û qayîl o. Baxoz de 8-9 eşîrê erebî estê û hînî ma pîya bi aramî ciwîyenê. 23ê Adare ma rê rojbîyayîşo diyîn bi.  Ma mînetdarê şerwananê QSDyê ke seba ma canê xo feda kerdî.''

Madlîne Abdûrrahman vat: ''Ma DAÎŞî ra zaf zulm dî. Ma tersayêne ke keyeyê xo ra vejîyê teberî. DAÎŞî ma kerdêne hedef û ma rê teda kerdêne. Ma nika azad ê û eşkenê xo îfade bikerê. Cinîyî zî na rewşe ra zaf hêz gênê. Ez pêro şehîdan û fedayîyan pê na wesîle yad kena. Ma do yewîtî û serkewtişo ke pê bedelanê pîlan ame afernayene, bikerê pîlêr.''