Şemrexê Mêrdînî û Bagcilarê Îstanbulî de vera destsernayîşê îradeyî çalakîyê protestoyî ameyî kerdene. 

Şemrex de bi beşdarîya Wekîlanê DEM Partî Kamûran Tanhan, Salîha Aydenîz, Mehmet Ruştu Tîryakî û Hemşaredara Mêrdînî Devrîme Demîr rayraşîyayîş ame kerdene. Girseyî sloganê sey “Bijî Serok Apo”, “Jin Jiyan Azadî” û “Ji qeyûm re na,  rêz ji bo vînê” vatî. 

Tîryakîyî tîya de xîtabê şarî kerd û dîyar kerd ke îqtîdarî wextê weçînayîşan de xîret kerd ke şaredarîyanê DEMî bidizno la nêeşkayo. Tîryakîyî vat: ''Weçînayîşan ra pey bi Colemêrgî înan dest pê dizdîye kerd û dima zî çim verda Êlih, Mêrdîn û Xalfetî. Şarê ma ney qebul nêkeno. Şarê kurdî wayîrê îradeyê xo vejîyeno. Vera zulmê destsernayîşî şarê kurdî do xo ver bido.''

Bagcilar de serkêşîya Rêxistina DEM Partî de verê bînaya partîye de eşkerayîye dîyaye çapemenîye. Serekê CHPyî yê Bagcilarî Caner Salma û dezgehê sivîlî zî tewrê çalakîye bîyî. Çalakîye de pankarta 'Şaredarîyî ê ma yê, ma do destûr nêdê destsernayîşî' ameye akerdene. 

Hemsereka DEM Partî ya qeza Nurtene Varlik tîya de qisey kerd û îfade kerd ke ganî cade peynîya polîtîkaya qeyûman bêra ardene û vera ney têkoşîno hempar bêro kerdene.